Արտակարգ դեպք․ հիվանդանոց է տեղափոխվել 57-ամյա տղամարդ

SHAMSHYAN.com-ի տեղեկություններով՝ ապրիլի 17-ին արտակարգ դեպք է տեղի ունեցել Արարատի մարզում։ Ժամը 16։25-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Մասիսի բաժնում տեղեկություն է ստացվել, որ Այնթապ գյուղի 13 փողոցում գտնվող «Ռաֆ Դավ» ՍՊԸ-ում վերելակից վայր ընկնելու հետևանքով Մասիսի շտապօգնությունը «աջ ոտքի կոտրվածք» ախտորոշմամբ «Էրեբունի» բժշկական կենտրոն է տեղափոխել մի քաղաքացու։

Ինչպես հայտնում է ֆոտոլրագրող Գագիկ Շամշյանը, օպերատիվորեն հիվանդանոց է մեկնել ոստիկանության Մասիսի բաժնի օպերատիվ խումբը՝ համայնքային ոստիկան Ավագյանի գլխավորությամբ, որտեղ պարզել են, որ տուժածը Արարատի մարզի բնակիչ 57-ամյա Հակոբ Մ․-ն է։

Գ․ Շամշյանի տեղեկություններով՝ ոստիկանները պարզել են նաև, որ նույն օրը՝ ժամը 15։00-ի սահմաններում, Հակոբ Մ․-ն, գտնվելով աշխատանքի վայրում՝ նշված հասցեում գործող ավտոմեքենաների մասերի և պարագաների վաճառքի խանութում, բեռների համար նախատեսված վերելակով խանութի սրահից դեպի նկուղային հարկ ապրանք բարձրացնելու նպատակով նկուղ իջնելուց վերելակի ճոպանը պոկվել է և մոտ 2 մետր բարձրությունից ընկել է նկուղային հարկ, ինչի հետևանքով ստացել է նշված մարմնական վնասվածքը: