«Փողը լռություն է սիրում». Փաշինյանի մերձավորները դուրս են բերում իրենց գումարները

Վերջին երկու ամիսներին կապիտալի արտահոսք է սկսվել Հայաստանից։ Բանկային համակարգի մեր աղբյուրների փոխանցմամբ, մոտ 100 մլն և ավելի դոլարի մասին է խոսքը, ընդ որում, գումարները Հայաստանից հանում են ոչ միայն օլիգարխները, այլև մեծահարուստներ, որոնք սերտ առնչություն ունեն գործող իշխանությունների հետ։

Գումարների հիմնական մասը փոխանցվում է՝ իբր ինչ-որ սարքավորումներ և հումք գնելու համար, սակայն, մասնագետները վստահ են, որ հիմնականում այդ գումարները պարզապես Հայաստանից դուրս են հանվում։ Դուրս է բերվել նաև մեծ քանակությամբ կանխիկ գումար, իսկ փողերի հիմնական մասը ներդվել է կրիպտարժույթների մեջ։ Գաղտնիք չէ, որ իշխանությունը սերտ համագործակցում է «Ֆասթ» ընկերության հետ, որը սեփական կրիպտոարժույթն է ստեղծել, իսկ դա լավ հնարավորություն է գումարներ ներդնելու և Հայաստանից դուրս բերելու համար։

Օբյեկտիվորեն կարող է հարց ծագել, թե ինչու են մերձիշխանական օլիգարխներն ու պաշտոնյաները հանում իրենց կապիտալը։ Պատճառը Փաշինյանի իշխանության ապագայի անորոշությունն է, շատերն իշխող թիմում վստահ չեն, որ գործող վարչախմբին կհաջողվի պահպանել իր իշխանությունը, ուստի ձգտում են ապահովագրել իրենց։ Որոշ դեմքերում նույնիսկ հեռացել են Հայաստանից, իբր գործնական նպատակներով, բայց առաջիկա ամիսներին առնվազն մտադիր չեն վերադառնալ։ 

Մերի Մելքումյան