Նիկոլ Փաշինյանը հայ-ադրբեջանական նոր սրացման մասին

Հայաստան-Ադրբեջան նոր սրացում ու նոր պատերազմ չի լինելու, մոռացեք այդ մասին, այս մասին ԱԺ-ում հայտարարեց վարչապետ Նիկոլ Փաշինյանը։

«Լինելու է խաղաղություն։ Հայաստանն ու Ադրբեջանը ճանաչել են միմյանց տարածքային ամբողջականությունը, ինքնիշխանությունը, միջազգայնորեն ճանաչված սահմանների անխախտելիությունը, ուժի ու ուժի սպառնալիքի կիրառման անթույլատրելիությունը»,- ասաց նա։

Փաշինյանը Հայաստանում ու Ադրբեջանում գործող բոլոր ուժերին կրկին կոչ արեց լինել ծայրահեղ պատասխանատու, չանել հայտարարություններ, որոնք ուղղակի կամ անուղղակի հակասում են այս տրամաբանությանը։

«Պաշտոնապես հայտարարում եմ՝  Հայաստանի կառավարությունը չի անելու հայտարարություններ ու գործողություններ, որոնք ուղղակի կամ անուղղակի հակասում են այս տրամաբանությանը կամ կասկածի տակ են դնում այս տրամաբանությունը»,- շեշտեց նա՝ նույնն էլ կոչ անելով ադրբեջանական կողմին։

Նա հայտարարեց, որ Հարավային Կովկասի պատմության նոր էջը պետք է բացել Ադրբեջանի հետ միասին ու Հայաստանը  պատրաստ է միաժամանակ ստորագրել խաղաղության համաձայնագիրն ու ԵԱՀԿ ՄԽ կառույցները լուծարելու մասին Հայաստան-Ադրբեջան համատեղ դիմումը ԵԱՀԿ-ին։