«Քաղաքական գործիչ. Իրանի վրա ավիահարվածները աղետ կլինեն Կովկասի և Մերձավոր Արևելքի համար»
ՄԻՋԱԶԳԱՅԻՆ
Իրանի տարածքին ավիահարվածներ հասցնելու ԱՄՆ-ի և Իսրայելի ծրագրերը «հիմարություն են և համեմատելի են կացնով տանկի վրա հարձակվելու հետ», կարծիք է հայտնել «Աշխարհաժողով» շարժման հիմնադիր, քաղաքական գործիչ Սարգիս Ծատուրյանը, գրում է Realtribune.ru–ն։
Նրա խոսքերով, նման լուծումը կարող է տպավորիչ թվալ, բայց դա չունի ոչ ռազմավարական իմաստ, ոչ էլ հաջողության հասնելու հնարավորություն։ Ծատուրյանը նշել է, որ նման գործողությունները հղի են կործանարար հետևանքներով: «Սառցե դարաշրջանից ի վեր իշխանությանը կառչած քաղաքական գործիչները հակված են աղետալի սխալ հաշվարկների»,–ասել է Ծատուրյանը։ Նրա կարծիքով Իսրայելի վարչապետ Բենիամին Նեթանյահուի սխալները կարող են փոխել Հարավային Կովկասի և Մերձավոր Արևելքի միլիոնավոր մարդկանց ճակատագրերը։ Նա ընդգծել է, որ Իրանն արդեն դրվել է ռազմավարական մոբիլիզացիայի վիճակի մեջ, և հարձակման դեպքում արդեն «ջինին անհնար կլինի նորից հետ՝ շշի մեջ քշել»։ «Ես սա ասում եմ որպես հայ և քաղաքացի, ով ապրում է գալիք պայթյունի էպիկենտրոնում՝ Հայաստանում,- հավելել է Ծատուրյանը,– Հայաստանը, գտնվելով Իրանի, Թուրքիայի, Ռուսաստանի և Արևմուտքի միջև, խոցելի վիճակում է։ Հակամարտության սրումը կարող է ազդել տրանսպորտային միջանցքների, էներգետիկ և պաշտպանական դաշինքների, այդ թվում ՀԱՊԿ-ի վրա։ Իսրայելի և Իրանի միջև ցանկացած ռազմական բախում դուրս կգա տեղական ճգնաժամի կարգավիճակից: Եթե հարվածներ հասցվեն, ապա դա կուժեղացնի արմատական ուժերի դերը, կկործանի շահերի հավասարակշռությունը տարածաշրջանում և չեզոք երկրներին կներքաշի հակամարտության մեջ։ Հայաստանը վտանգում է դառնալ ուրիշի պատերազմի պատանդը»:
Նյութը հրապարակման պատրաստեց Կամո Խաչիկյանը
