ԱՄՆ Սենատը Ռուսաստանի դեմ պատժամիջոցների նոր փաթեթ է ներկայացրել
ՄԻՋԱԶԳԱՅԻՆ
Հանրապետական սենատոր Լինդսի Գրեմը և նրա դեմոկրատ գործընկեր Ռիչարդ Բլումենթալը ներկայացրել են օրինագիծ, որը ենթադրում է առաջնային և երկրորդային պատժամիջոցներ Ռուսաստանի դեմ, եթե վերջինս չհամաձայնի Ուկրաինայի հետ զինադադարին, գրում է The Hill-ը։
Այս պատժամիջոցները կկիրառվեն, եթե Ռուսաստանը հրաժարվի բարեխղճորեն բանակցել Ուկրաինայի հետ կայուն խաղաղության համար կամ ձեռնարկի այլ գործողություններ, ներառյալ ռազմական միջամտությունը, որոնք կխաթարեն Ուկրաինայի ինքնիշխանությունը խաղաղության հաստատումից հետո: Օրինագիծը նաև 500% մաքսատուրք է սահմանում ռուսական նավթ, գազ, ուրան և այլ ապրանքներ գնող երկրներից ապրանքների ներմուծման հանդեպ»,- ասվում է զեկույցում։
Փաստաթղթում նշվում է, որ օրինագծին կողմ են ԱՄՆ 100 սենատորից 50-ը՝ 25 հանրապետական, 24 դեմոկրատ և մեկ անկախ: Չորս կոնգրեսական (երկու հանրապետական և երկու դեմոկրատ) արդեն համաձայնել է այս օրինագիծը ներկայացնել Ներկայացուցիչների պալատ։
«Մենք աջակցում ենք կայուն, արդար և արժանապատիվ խաղաղություն ապահովելու նախագահ Թրամփի ձգտումը»,- ասել են օրենսդիրները:
Նրանք համոզված են, որ Ռուսաստանի դեմ այս պատժամիջոցները կստանան ճնշող երկկուսակցական և երկպալատ աջակցություն, եթե քվեարկության դրվեն Սենատում և Ներկայացուցիչների պալատում:
