«Քաղպայմանագիրը» քննարկել է, թե ում «գլուխներն են թռչելու»

Երեկ երեկոյան տեղի է ունեցել «Քաղաքացիական պայմանագիր» կուսակցության Վարչության նիստը։ Կուսակցության մամուլի ծառայության փոխանցմամբ, քննարկվել են խաղաղության գործընթացին առնչվող հարցեր, ինչպես նաև ամփոփվել են Գյումրու և Փարաքարի ՏԻՄ ընտրությունների արդյունքները։ ՔՊ-ն այլ մանրամասներ չի հաղորդում։

Սա Գյումրիում և Փարաքարում կրած պարտություններից հետո ՔՊ վարչության երկրորդ նիստն է, առաջինը կայացել էր մայիսի 31-ի կեսօրին, և այդ նիստում որոշվել էր պարտադրել Վիլեն Գաբրիելյանին ցած դնել մանդատը։ Մեր տեղեկություններով, երեկվա նիստն էլ հարթ չի ընթացել, նույնիսկ տարածված տեսանյութից է ակնհայտ, որ Նիկոլ Փաշինյանն ու կուսակցության ղեկավար կազմը նյարդային են ու վախվորած։

ՔՊ-ում հրաշալի հասկանում են, որ Գյումրին ու Փարաքարը կարող են հիմք դնել իշխանազրկման համար։ Պարտությունները նաև զգալի ազդել են կուսակիցների տրամադրությունների վրա, խուճապի մատնել նրանց։ Այսօր Փաշինյանը խնդիր ունի ապահովել շարքերի ամրությունը, նաև պատժելու բոլոր մեղավորներին։ Ընդ որում, պատժելու են նաև այն անձանց, ովքեր միտումնավոր թույլ են տվել, որ Վիլեն Գաբրիելյանը հարբած վիճակում հայտնվի լրագրողների թիրախի տակ։ Այդ կապակցությամբ, ՔՊ վարչությունում վստահ են, որ դավադրություն է եղել։

Ուշագրավ է, որ նիստին չի մասնակցել Երևանի քաղաքապետ Տիգրան Ավինյանը, թեպետ նա Երևանում է, վերջին օրերին էլ մի քանի տեսանյութ է տարածել քաղաքապետարանի նախաձեռնությունների վերաբերյալ։ Փաշինյանի թիվ մեկ թիրախում հենց Ավինյանն է, որին այլևս չեն վստահում, կարծում են՝ քաղաքապետի գործողություններն իրենց ավելի շատ վնաս են տալիս, քան օգուտ։

Անի Մաթևոսյան