Իսրայելը անջատել է Գազայի հատվածում էներգամատակարարումը․ ԶԼՄ

ՀԱՄԱՍ-ում քննադատել են Գազայի հատված էլեկտրաէներգիայի մատակարարումն անջատելու Իսրայելի իշխանությունների որոշումը, հաղորդում են մերձավորարեւելյան լրատվամիջոցները, փոխանցում է EADaily-ն:

«Մենք խստորեն դատապարտում ենք Գազայում էլեկտրականության անջատումը պարենից, դեղամիջոցներից եւ ջրից զրկվելուց հետո», - մեջբերում են ԶԼՄ-ները ՀԱՄԱՍ-ի քաղբյուրոյի անդամ Իզզաթ ար Ռիշկի հայտարարությունը:

Նրա խոսքով՝ սա «ճնշում գործադրելու փորձ է»։

Times of Israel-ը, վկայակոչելով իսրայելցի պաշտոնյային, նշում է, որ անջատումը վերաբերելու է մեկ աղազերծման կայանի՝ Գազայի հատվածի միակ օբյեկտի, որը միացված է Իսրայելից էլեկտրահաղորդման գծին:

Կիրակի երեկոյան Իսրայելի էներգետիկայի նախարար էլի Քոենը հայտարարել է, որ «անմիջապես» դադարեցնելու է Գազայի հատված էլեկտրաէներգիայի մատակարարումը:

«Մենք կօգտագործենք մեր ունեցած բոլոր գործիքները, որպեսզի ապահովենք մեր պատանդների վերադարձը տուն և պատերազմից հետո Գազայում ՀԱՄԱՍ-ի բացակայությունը», - ասել է նա: