ԿԽՄԿ գործունեության դադարեցումը կվտանգի հայ ռազմագերիների ճակատագիրը

Ադրբեջանի իշխանությունները կրկին քայլ են անում՝ խոչընդոտելու միջազգային հումանիտար կառույցների գործունեությունը: Այս անգամ նրանց թիրախում է Կարմիր խաչի միջազգային կոմիտեն (ԿԽՄԿ), որը, ի թիվս այլ հարցերի, տարիներ շարունակ հետևել է Ադրբեջանում պահվող ռազմագերիների և քաղաքացիական անձանց իրավունքներին:

Ըստ պաշտոնական աղբյուրների, Բաքուն ԿԽՄԿ-ին ծանուցել է կառույցի գործունեությունը դադարեցնելու մասին։

«Սա մեծապես կվտանգի հայ ռազմագերիների ճակատագիրը։ Սա միայն մեկ օրինակն է։ Եթե այս որոշումը կյանքի կոչվի, ապա Ադրբեջանում պահվող անձանց իրավունքները կմնան ամբողջությամբ երկրի իշխանությունների տրամադրության տակ՝ առանց որևէ միջազգային վերահսկողության»,- MediaHub-ի հետ զրույցում ասում է վերլուծաբան Արմինե Հայրապետյանը։

Ադրբեջանի քաղաքականությունն այստեղ պարզ է. կրճատել միջազգային կառույցների ներգրավվածությունը և խուսափել թափանցիկությունից։ 

«Անկախ նրանից՝ մենք վստահում ենք ԿԽՄԿ Բաքվի առաքելությանը, թե ոչ, բայց ամեն դեպքում դա միակ միջազգային կառույցն էր, որը մոնիթորինգ իրականացնելու իրավասություն ուներ»,- նշում է նա։ 

Հայրապետյանի խոսքով՝ կառույցի գործունեության դադարեցումը տեղավորվում է Ադրբեջանի՝ Արցախի հարցը միջազգային քննարկումներից դուրս թողնելու փորձերի մեջ։ Միջազգային կառույցները պետք է անհապաղ ջանքեր գործադրեն, կանխելու նոր հումանիտար աղետը։

Հունան Թադևոսյան