Թուրքիան չի շտապում սահմանը բացելու հարցում

Հայաստան-Թուրքիա պետական սահմանի «Մարգարա» անցման կետում սահմանային ծառայությունն այլևս իրականացնում են միայն Հայաստանի սահմանապահ զորքերը։ «ՌԴ ԱԴԾ Սահմանապահ զորքերին երախտագիտությունս եմ հայտնում Հայաստան-Թուրքիա պետական սահմանի այս հատվածում իրականացրած ծառայության համար», - սոցիալական ցանցում գրել է Նիկոլ Փաշինյանը։

«Մարգարա» անցման կետը չի գործում Հայաստանի և Թուրքիայի միջև պետական սահմանի փակ լինելու պատճառով։ 2022 թվականի ամռանն անցման կետը կառավարության որոշմամբ հիմնանորոգվեց, և այնտեղ սկսվեց իրականացվել մշտական ծառայություն՝ ՌԴ Սահմանապահ զորքերի ուժերով։

Հայկական կողմը բազմիցս հայտնել է, որ անցակետը պատրաստ է շահագործման, բայց դրա բացման համար հարկավոր է քաղաքական որոշում։ Թուրքիան, իհարկե, դեռ մտադիր չէ բացել սահմանները, նույնիսկ երրորդ երկրների քաղաքացիների համար, ուր մնաց՝ բեռնափոխադրումների կամ երկու երկրների քաղաքացիների անցման համար։ Իսկ հայկական կողմը շտապում է։ Շտապում է նաև ռուս սահմանապահներին անցակետերից հեռացնելու հարցում։

Փաշինյանի այս քաղաքականությունը լիովին տեղավորվում է հակառուսականության շրջանակներում, իսկ գործող իշխանության քարոզիչներն ընդհուպ պահանջում են ռուսական 102-րդ ռազմակայանի հեռացում։ Չի բացառվում, որ պաշտոնական Անկարան նաև այդ պահանջը դրած լինի ՀՀ գործող իշխանությունների առջև՝ իր ազդեցությունը տարածաշրջանում ավելացնելու համար։

Նարինե Միրզոյան