Վարդենիսում և՛ հիվանդանոց են կառուցում, և՛ հինն են նորոգում. 20 մլն դրամի հետքերով. «Ժողովուրդ»
ՄԱՄՈՒԼԻ ՏԵՍՈՒԹՅՈՒՆ
«Ժողովուրդ» օրաթերթը գրում է. «Ուղիղ մեկ տարի առաջ ՀՀ ԱԺ պատգամավոր Թագուհի Թովմասյանը ՀՀ առողջապահության նախարար Անահիտ Ավանեսյանից հետաքրքրվեց, թե երբ է կառուցվելու Վարդենիսի նոր հիվանդանոցը: Նախարարը անցած տարի՝ փետրվարի 28-ին, հայտարարեց, որ նախագծման աշխատանքներն ավարտական փուլում են, շուտով մրցույթ կհայտարարվի: Նոր մրցույթի մասին տեղեկություններ բաց աղբյուրներում «Ժողովուրդ» օրաթերթը չգտավ:
Փոխարենը, Գեղարքունիքի մարզպետ Կարեն Սարգսյանը չորեքշաբթի այցելել էր Վարդենիսի բժշկական կենտրոն, որին ՀՀ պետական բյուջեի «Առողջապահական ոլորտում պետական քաղաքականության մշակում, ծրագրերի համակարգում և մոնիթորինգ» ծրագրի «Առողջապահական համակարգի պետական առևտրային և ոչ առևտրային կազմակերպություններին ֆինանսական աջակցության հատկացում» միջոցառման իրականացման նպատակով հատկացվել է 20 միլիոն ՀՀ դրամ գումար:
Դրամաշնորհային ծրագրի շրջանակներում, ըստ մարզպետի, իրականացվում են «Վարդենիսի» ԲԿ հիվանդանոցային մասնաշենքի մասնակի ներքին հարդարման և ընթացիկ վերանորոգման աշխատանքներ՝ մինչև կմեկնարկի նոր բժշկական կենտրոնի կառուցումը։
Փաստորեն, նոր հիվանդանոցի կառուցումը, որը նախատեսված է Կառավարության կապիտալ ծախսերով, «ուշանում» է եւ դեռ պարզ չէ՝ երբ կսկսի կառուցվել: Իսկ նախարարը ասում էր՝ «շուտով»: Բայց միաժամանակ էլ մոտ 50 հազար դոլար է ծախսվում կոսմետիկ նորոգման համար:
Ի դեպ, նախարարը խոստացել էր նաև, որ պետք է այդ հաստատության մեջ դիահերձարան էլ կառուցվի, սակայն սայլը տեղից դեռ չի շարժվում: Առայժմ միայն հին հիվանդանոցն են «կարկատում»»:
Մանրամասները՝ «Ժողովուրդ» օրաթերթի այսօրվա համարում:
