Ավինյանին «մատաղ կանեն» հանուն Փաշինյանի վարկանիշի

Երեկ տեղացած և այսօր շարունակվող ձյունը հերթական անգամ ցույց տվեց գործող իշխանությունների ապիկարությունը, տարրական աշխատանք կազմակերպելու անընդունակությունը, իսկ հազարավոր երևանցիներ ժամեր ստիպված էին անցկացնել փողոցներում՝ տրանսպորտ չգտնելով տուն հասնելու համար։ Օբյեկտիվորեն դժգոհողների թիրախում հենց Երևանի քաղաքապետարանն է, որը, թեև տեղյակ էր առատ ձյան հավանականության մասին, բայց անհրաժեշտ միջոցներ չէր ձեռնարկել։

Ավելին, քաղաքացիները պեղել էին դեռ 2016 թ. ակտիվիստ Տիգրան Ավինյանի մի գրառումը, որով նա Տարոն Մարգարյանին կոչ էր անում բահ վերցնել և մաքրել փողոցները։ Քաղաքապետն ու պատասխանատուները, իհարկե, ողջ գիշեր փողոցում էին, փորձում էին վերահսկել իրավիճակը, կազմակերպել ձնամաքրման աշխատանքները, բայց բանը բանից անցել էր։

Իրավիճակը, ի դեպ, ուրախացրել է ՔՊ այն դեմքերին, որոնք Փաշինյանի հետ աշխատում են քաղաքապետի դեմ։ «Տիգրան, սիրուն չի» օպերացիան սարերի ետևում չէ, ՔՊ մեր աղբյուրի փոխանցմամբ, Նիկոլ Փաշինյանը ցանկանում է օգտագործել պահն ու հեռացնել քաղաքապետին։ Այդկերպ, մի ձեռքով երկու ձմերուկ կբռնի, կազատվի թե՛ իր հիմնական մրցակիցներից մեկից, թե՛ այդ հանգամանքը կօգտագործի իր թիմի վարկանիշը բարձրացնելու համար։ 

Դիանա Հովսեփյան