Անօգնական ու վիրավոր ձիու տերը, ով գտնվում էր ՌԴ-ում, օդանավակայանից անմիջապես եկել է ձիու մոտ

Երեկ՝ փետրվարի 15-ին, SHAMSHYAN.com-ը ֆոտոռեպորտաժ, տեսանյութ էր հրապարակել Կոտայքի մարզում, Եղվարդ-Աբովյան ավտոճանապարհի դաշտամիջյան հատվածում գտնվող վիրավոր ու անօգնական ձիու վերաբերյալ։

Ինչպես հայտնում է ֆոտոլրագրող Գագիկ Շամշյանը, հրապարակումից կարճ ժամանակ անց ձիուն օգնության հասան բնապահպան-լրագրող Նարինե Կիրակոսյանը, «Էնդեմիկ և վտանգված տեսակների պահպանություն» հիմնադրամի տնօրեն Մանուկ Մանուկյանը և որ ամենակարևորն է՝ ձիու տերը։ Նա ևս տեղեկացել էր SHAMSHYAN.com-ից, ով գտնվում էր Ռուսաստանի Դաշնությունում և երեկ արդեն վերադարձել է Հայաստան և անմիջապես օդանավակայանից եկել էր ձիու գտնվելու վայրը ու արդեն Մ․ Մանուկյանի և մի քանի քաղաքացիների օգնությամբ նա ձիուն տեղափոխեց նախկին կացարան, որը Զովունիում էր։ Պարզվել է նաև, որ փետրվարի 11-ին, ձիուն հարվածել է «Ford Transit» մակնիշի ավտոմեքենա, որի վերաբերյալ ՀՀ Ներքին գործերի նախարարության ոստիկանության Պարեկային ծառայության Կոտայքի մարզի գումարտակի 2-րդ վաշտի 2-րդ դասակում փաստաթղթեր են ձևակերպվել։

Հրապարակումից կարճ ժամանակ անց նաև բազմաթիվ քաղաքացիներ նամակներ են գրել SHAMSHYAN.com-ին և ցանկություն հայտնել, որ ձիուն տան իրենց և իրենք հոգան առողջական խնդիրները և ստանձնեն հետագա խնամքը։