Քաղաքագետը մատնանշել է Երևանի զգալի հետաքրքրությունը ԵԱՏՄ-ի նկատմամբ չնայած Մինսկի հետ տարաձայնություններին

Բելառուսի և Հայաստանի միջև տարաձայնությունները պայմանավորված են պատմական համատեքստով և քաղաքական գործիչների մտադրությամբ ուժեղացնել իրենց հեղինակությունը սեփական պետություններում։ Չնայած դրան, Եվրասիական տնտեսական միությունը (ԵԱՏՄ) շարունակում է գրավիչ մնալ ինչպես Մինսկի, այնպես էլ Հայաստանի համար, iz.ru-ի հետ զրույցում այս մասին նշել է Հանցագործության և ահաբեկչության դեմ պայքարի միջազգային կենտրոնի նախագահ, միջազգային քաղաքագետ Էնես Կարախանովը։

Հիշեցնենք, որ ավելի վաղ Բելառուսի նախագահ Ալեքսանդր Լուկաշենկոն և Հայաստանի վարչապետ Նիկոլ Փաշինյանը հրապարակավ վիճել էին Լենինգրադի մարզում կայացած ԵԱՏՄ գագաթնաժողովում։ Փաշինյանն ասել էր, որ հայկական պատվիրակությունը Մինսկում հաջորդ հանդիպմանը մասնակցելու է հեռակա կարգով, ինչին Լուկաշենկոն տարակուսել էր, թե ո՞րն է խնդիրը և ասել, որ «անհրաժեշտության դեպքում» կարող է կազմակերպել քաղաքական գործիչների տեղափոխումը Բելառուս։

Մեկնաբանելով դա Կարախանովը բացատրել է, որ անհամաձայնության պատճառներից մեկն այն է, որ Բելառուսը իրեն համարում է Ռուսաստանի ամենամոտ դաշնակիցը, մինչդեռ Հայաստանը վերջերս սկսել է հեռանալ Ռուսաստանի Դաշնությունից։ «Մինսկն իր հերթին չի թաքցնում իր համակրանքն Ադրբեջանի նկատմամբ, որը լրացուցիչ և շատ ուժեղ գրգռիչ է դարձել Հայաստանի համար։ Բելառուսի դիրքորոշումը, որն արտահայտվել է մասնավորապես Ադրբեջանին զենք վաճառելով, Երևանն ընկալում է որպես ուղղակի աջակցություն հակառակորդին (Լեռնային Ղարաբաղի հիմնախնդրի ֆոնին), ինչը մեծացնում է օտարումը»,- նշել է հրատարակության զրուցակիցը։

Բացի այդ, փորձագետը կարծում է, որ միմյանց հասցեին ուղղված կոշտ հռետորաբանության շնորհիվ և՛ Լուկաշենկոն, և՛ Փաշինյանն ամրապնդում են իրենց հեղինակությունը։ Այսպիսով, ԵԱՏՄ գագաթնաժողովում նրանց դիմակայությունը թելադրված էր ոչ այնքան ռազմավարական շահերով, որքան իրենց քաղաքական կապիտալն ուժեղացնելու ցանկությամբ, խոստովանել է քաղաքագետը։ «ԵԱՏՄ-ին մասնակցության տնտեսական օգուտները Հայաստանի համար մնում են զգալի՝ չնայած քաղաքական տարաձայնություններին։ Բելառուսն իր հերթին շահագրգռված է ինտեգրացիոն հարթակների աշխատանքի պահպանմամբ որպես իր տարածաշրջանային ազդեցության ամրապնդման գործիք»,- եզրափակել է նա։

Միևնույն ժամանակ, Կարախանովն ընդգծել է, որ քաղաքական փոխգործակցության մակարդակում այնպիսի բախումներ, ինչպիսիք են Փաշինյանի վերջին հայտարարությունները Բելառուսում հանդիպման բոյկոտի մասին, խաթարում են համերաշխությունն ու վստահությունը։

Նյութը հրապարակման պատրաստեց Կամո Խաչիկյանը

www.1or.am