Բյուրականի աստղադիտարանի նորընտիր տնօրենը մտադիր է փոփոխություններ իրականացնել

ՀՀ ԳԱԱ Վիկտոր Համբարձումյանի անվան Բյուրականի աստղադիտարանում սպասվում են կառուցվածքային փոփոխություններ: Այս մասին «Արմենպրես»-ի մամուլի սրահում հրավիրված ասուլիսում նշեց Բյուրականի աստղադիտարանի նորընտիր տնօրեն Արեգ Միքայելյանը:

«Մինչև հիմա մեզ մոտ չկային պաշտոնապես ձևավորված բաժիններ: Յուրաքանչյուր փոքրիկ խումբ կամ առանձին գիտնական աշխատում էր այն ծրագրով, որով հարմար էր գտնում: Դա արդյունավետ չէր այնքան»,- ասաց Արեգ Միքայելյանը: արդեն իսկ հայտարարվել է գիտահետազոտական բաժինների վարիչների մրցույթ:

Արեգ Միքայելյանը կարծում է, որ պետք է զարգացնել և ավելի շատ առաջընթաց ապահովել: Նա նկատեց, որ հիմա աշխարհում գիտությունը մեծ քայլերով առաջ է գնում, հետևաբար պետք է հետ չմնալ:

«Պետք է ունենանք զարգացման հեռակա տեսլական, այսինքն` մի քանի տասնյակ տարիների համար: Դա միջազգային մոտեցում է: Բյուրականի աստղադիտարանը պետք է դրան համընթաց գնա: Զարգացման տեսանկյունից այսօր երկու հակասական մոտեցման առաջ ենք կանգնել: Մեկն ավանդական ուղղություններն են, որոնք ուզում ենք պահպանել, զարգացնել, երկրորդը ժամանակից ուղղություններին հետևելն ու հետազոտություններ կատարելն է: Իմ մոտեցումը հետևյալն է, ոչ թե պետք է կտրուկ որոշում կայացնել, թե որ ուղղությունը պահել, այլ թույլ տալ, որ զարգանա ցանկացած նախագիծ, որը կկարողանա ապացուցել իր գոյության իրավունքը»,- ասաց նա: