The Times. Մեծ Բրիտանիան պաշտպանված չէ բալիստիկ հրթիռների հնարավոր հարձակումներից
ՄԻՋԱԶԳԱՅԻՆ
Մեծ Բրիտանիայի տարածքը գործնականում պաշտպանված չէ ոչ միջուկային բալիստիկ հրթիռների հնարավոր հարձակումից: Այսպիսի եզրակացություն է արվում բրիտանական The Times թերթի հետաքննության մեջ։
Ուկրաինայի դեմ մեծ հեռահարության հրթիռների կիրառմամբ Ռուսաստանի ավերիչ հարձակումները հանգեցրել են նրան, որ եվրոպական շատ երկրներ շտապում են ավելի շատ ՀՕՊ միջոցներ գնել, մինչդեռ Մեծ Բրիտանիան չունի ցամաքային հակաօդային պաշտպանություն՝ կարևոր ենթակառուցվածքները կամ բնակավայրերը բալիստիկ հրթիռներից պաշտպանելու համար, հայտնում է DW-ն։ Տասնյակից ավելի գործող զինվորականների և պաշտպանության փորձագետների հետ հարցազրույցները բացահայտել են Մեծ Բրիտանիայի և նրա արտասահմանյան ռազմակայանների համար աճող վտանգը, քանի որ Չինաստանը, Ռուսաստանը և Իրանը արագորեն բալիստիկ հրթիռներ են ստեղծում, որոնք կարող են հատել մայրցամաքները ձայնի արագությունը մի քանի անգամ գերազանցող արագությամբ:
Ըստ The Times-ի, Մեծ Բրիտանիան տասնամյակներ շարունակ հակահրթիռային պաշտպանության համակարգերում ներդրումներ չի կատարել՝ ո՛չ ցամաքում, ո՛չ օդում, ո՛չ ծովում։ Արդյունքում, Թագավորական ՌՕՈՒ-ի ժամանակակից կործանիչները չունեն բալիստիկ հրթիռներ որսալու հրթիռային համակարգեր։ Գոյություն ունեցող ցամաքային հակաօդային պաշտպանության համակարգերից ոչ մեկը նախատեսված չէ նման հրթիռներ ոչնչացնելու համար։
Պատճառը, որ Մեծ Բրիտանիան շատ թույլ հակաօդային պաշտպանություն ունի, այն է, որ 30 տարի ոչ ոք չէր կարծում, որ դրանք մեզ պետք են, ասել է աղբյուրը:
