Ալիևը հրահանգել է ադրբեջանական ավիաընկերություններին անորոշ ժամանակով դադարեցնել թռիչքները դեպի Ռուսաստանի քաղաքներ

Ադրբեջանի նախագահ Իլհամ Ալիևը հայտարարել է, որ դեպի Ռուսաստանի 10 քաղաքներ թռիչքներն անորոշ ժամանակով դադարեցնելու մասին երկրի իշխանությունների որոշումը պայմանավորված է անվտանգության նկատառումներով։

«Ես նման հանձնարարական եմ տվել, և դրա հիմնական պատճառը, իհարկե, անվտանգության հետ կապված խնդիրներն են, ի վերջո, Ռուսաստանի շատ քաղաքներում օդային տարածքը պարբերաբար փակ է, և այնտեղ գործում է հատուկ ռեժիմ», - ասել է Ալիևը:

Նրա խոսքով՝ ադրբեջանական AZAL–ն անորոշ ժամկետով դադարեցրել է թռիչքները դեպի Ռուսաստանի յոթ քաղաքներ։ «Միևնույն ժամանակ, մենք դադարեցրել ենք նաև ռուսական ավիաընկերությունների թռիչքները Ռուսաստանի երեք քաղաքներից դեպի Ադրբեջան, ուստի մենք այժմ դադարեցրել ենք օդային հաղորդակցությունը ընդհանուր առմամբ 10 քաղաքների հետ, և այստեղ, կրկնում եմ, առաջին պլան են մղվում անվտանգության խնդիրները։ Մենք միշտ առաջնահերթ ենք համարել մեր ուղևորների անվտանգությունը», - ասել է նա։

Ալիեւի խոսքով՝ ամենայն հավանականությամբ, դեպի Գրոզնի թռիչքները չեն վերականգնվի։ Նա հավելել է, որ դեպի ռուսական քաղաքներ թռիչքները վերսկսելու որոշումը կընդունվի՝ հաշվի առնելով Ռուսաստանի օդային տարածքի անվտանգությունը։