Սիրիայի նախագահի ինքնաթիռն անհետացել է ռադարներից. աղբյուր

Սիրիայի նախագահ Բաշար Ասադի ինքնաթիռն անհետացել է ռադարներից, տեղեկացրել է Reuters-ը՝ հղում անելով Flightradar 24 ծառայությանը:

Ավելի վաղ հաղորդվել էր, որ սիրիական կառավարական ինքնաթիռը օդ է բարձրացել Դամասկոսի օդանավակայանից։ Սակայն ռուսաստանյան ԶԼՄ-ները հայտնում են, որ, ըստ Սիրիայի նախագահի գրասենյակի, Ասադը չի լքել երկիրը։

Իր հերթին Al Jazeera-ն հայտնել է, որ օդանավակայանը թուրքամետ զինյալների հսկողության տակ հայտնվելուց մի քանի րոպե առաջ թռիչքներին հետևող համակարգերը մեկ ինքնաթիռ են հայտնաբերել Սիրիայի օդային տարածքում. Syrian Air 9218 համարով Իլ-76 ինքնաթիռը վերջին թռիչքն է եղել Դամասկոսից։

Սկզբում ինքնաթիռը ուղղվել է արևելք, հետո թեքվել հյուսիս։ Մի քանի րոպե անց նրա ազդանշանն անհետացել է, երբ այն պտտվել է Հոմսի վրա:

CNN-ն էլ, վկայակոչելով թուրքամետ ուժերի իրազեկ աղբյուրին, հայտնում է, որ Բաշար Ասադի ակտիվ որոնումներ են ընթանում, զինյալները հարցաքննում են սիրիական զինվորական սպաներին և հետախուզության աշխատակիցներին, որոնք կարող են տեղյակ լինել նրա տեղաշարժերին։