Թրամփն ուզում էր իմանալ՝ ինչ կարծիք ունեմ Պուտինի մասին. Ավստրիայի կանցլեր

Ավստրիայի կանցլեր Կառլ Նեհամերը հայտնել է, որ ԱՄՆ նորընտիր նախագահ Դոնալդ Թրամփը հեռախոսազրույցի ընթացքում իր կարծիքն է հարցրել Ռուսաստանի Դաշնության նախագահ Վլադիմիր Պուտինի մասին։ Այս մասին գրում է ՌԻԱ «Նովոստի»-ն:

«Նա (Դոնալդ Թրամփը - Խմբ.) լավ էր պատրաստված զրույցին, որում անմիջապես սկսեց խոսել Ռուսաստանի և Ուկրաինայի միջև հակամարտության մասին։ Նա ուզում էր իմանալ իմ եզրակացությունները... ինչպիսի՞ն է իմ կարծիքը նախագահ Պուտինի մասին։ Սա իսկապես ցույց է տալիս նրա հետաքրքրությունը»,- ասել է Նեհամերը ավստրիական Puls24 հեռուստաալիքին տված հարցազրույցում:

Ավստրիայի կառավարության ղեկավարը նաև կարծիք է հայտնել, որ Թրամփը կարող է նոր դինամիկա հաղորդել ստեղծված իրավիճակին։

Կառլ Նեհամերը նոյեմբերի 25-ին կեսժամյա զրույց է ունեցել Դոնալդ Թրամփի հետ։ Քաղաքական գործիչները մտքեր են փոխանակել ընթացիկ միջազգային օրակարգի, այդ թվում՝ Ուկրաինայի հակամարտության շուրջ։