«Հասանք մեր ուզածին»․ Ալիև

Հայաստանը պետք է հրաժարվի Ադրբեջանի հետ սպառազինման և մրցակցության քաղաքականությունից: Այս մասին հայտարարել է Ադրբեջանի նախագահ Իլհամ Ալիևը, փոխանցում է «Ազերթաջ»-ը։

«Ես մի քանի անգամ խոսել եմ այս մասին։ Եվ նրանք գիտեն, որ պետք է լսել իմ խոսքերը։ Նրանք պետք է հրաժարվեն դրանից, քանի դեռ ուշ չէ»,- ասել է Ադրբեջանի նախագահը։

Ալիևը կոչ է արել Հայաստանին հրաժարվել բանակի հետագա զինումից՝ ժողովրդին ուղղված ուղերձում՝ Շուշի քաղաքն Ադրբեջանի վերահսկողության տակ վերադարձնելու տարեդարձի կապակցությամբ։ Նրա կարծիքով, Երևանը երբեք չի կարողանա մրցել Բաքվի հետ։ Քաղաքական գործիչը հավելեց, որ Ադրբեջանը հասավ իր ուզածին և ապահովեց իր տարածքային ամբողջականությունը։

Ավելի վաղ Ալիևը հայտարարել էր, որ Արևմուտքը ցանկանում է Հայաստանը դարձնել «խաղաղության աղավնի»։ Նրա խոսքով, «արևմտյան հովանավորները» ցանկանում են ստվերել Հայաստանի գործողությունները Լեռնային Ղարաբաղում վերջին 30 տարիների ընթացքում։