Պետդումայի պատգամավոր Դելյագինը Փաշինյանին առաջարկել է հայկական կոնյակը «թեյ» անվանել
ՔԱՂԱՔԱԿԱՆՈՒԹՅՈՒՆ
Հայաստանի վարչապետ Նիկոլ Փաշինյանը հանրապետությունում արտադրվող կոնյակը պետք է վերանվանի ոչ թե «բրենդի», այլ «թեյ»։ Նման կերպ է info24.ru-ի հետ զրույցում Պետդումայի տնտեսական քաղաքականության հանձնաժողովի փոխնախագահ Միխայիլ Դելյագինը մեկնաբանել Հայաստանի կառավարության ղեկավարի կոչը անգամ «ընտանիքներում» չօգտագործել «կոնյակ» անվանումը։
Ըստ պատգամավորի Փաշինյանը հրաժարվում է ազգային ինքնությունից հանուն եվրոպական ընտրության և հիմա «իր ֆրանսիացի տերերին ընդառաջ քայլ է արել» կոչ անելով համաքաղաքացիներին հայկական կոնյակն անվանել «բրենդի»։ Պատգամավորի խոսքով Ուկրաինայի կառավարության որոշ պաշտոնյաներ արդեն իսկ նման կերպ են վարվել։
Բայց Դելյագինը նշել է, որ Փաշինյանն այդ ալկոհոլային արտադրանքի համար ամենահարմար անունը չի ընտրել: «Բրենդի» անվանումը ֆրանսիական Կոնյակի շրջանից դուրս արտադրվող կոնյակային խմիչքների ընդհանուր ընդունված անվանումն է: Միևնույն ժամանակ, «Հայկական թեյ» անվանումը, ըստ պատգամավորի, ավելի հարմար կլիներ այդ ալկոհոլային խմիչքի համար։ «Կա ադրբեջանական թեյ, կա հայկական թեյ։ Ինձ թվում է, որ դա լավ ելք կլիներ ստեղծված իրավիճակից, բայց նման ելքը պահանջում է թեկուզ մի քիչ հումորի զգացում»,- ասել է Դելյագինը։
Հիշեցնենք, որ վերջերս Հայաստանի կառավարության նիստի ժամանակ Փաշինյանը կոչ էր արել հայրենակիցներին անգամ ընտանեկան մասնավոր զրույցներում հրաժարվել «հայկական կոնյակ» բառից և այն փոխարինել «բրենդի» բառով։ Նա ընդգծել էր, որ կոնյակը Ֆրանսիայի ոչ նյութական արժեքն է։ Քաղաքական գործչի հայտարարությունը դժգոհություն է առաջացրել որոշ համաքաղաքացիների մոտ։ Օրինակ ակտիվիստ Միկա Բադալյանը վարչապետին մեղադրել է հայկական ազգային ինքնությունը ոչնչացնելու փորձի մեջ։
Նյութը հրապարակման պատրաստեց Կամո Խաչիկյանը
