«Փաշինյանը Ռուսաստանին մեղադրել է Հայաստանում «իշխանության յուրացման» նախապատրաստման մեջ. «Սադրանքներ ու ֆանտազիաներ»»
ՔԱՂԱՔԱԿԱՆՈՒԹՅՈՒՆ
Հայաստանի վարչապետ Նիկոլ Փաշինյանը Ռուսաստանին մեղադրել է երկրում «իշխանության յուրացման» նախապատրաստման մեջ։ Նա նաև հայտարարել է, որ ՀԱՊԿ-ը սպառնում է Հայաստանի ինքնիշխանությանը: Քաղաքագետ ու լրագրող Յուրի Սվետովը 360.ru-ի եթերում հաղորդավար Ռեգինա Օրեխովային պատմել է, թե ինչու է Հայաստանի վարչապետը նման հայտարարություններ անում BRICS-ի գագաթնաժողովի նախօրեին, որին նա նախատեսում է մասնակցել։
Քաղաքագետը մեկնաբանել է Հայաստանում հեղաշրջում նախապատրաստելու մեջ մեղադրվող ամբաստանյալների խուզարկության տեսագրությունը։ Կադրերում երևում է, թե ինչպես են անվտանգության ուժերը ցուցադրում ենթադրյալ դիվերսանտների իրերը, այդ թվում սառը զենքն ու փողերը: «Հասկանալի է, որ նրանք դրանով «լրջորեն» են զբաղվում։ Կարելի է տեսնել, թե ինչպես են գումարը հաշվում, մի ամբողջ 20 հազար ռուբլի: Նման փողերով, իհարկե, կարելի է կազմակերպել ցանկացած իշխանության յուրացում։ Դանակները, այդ 20 հազար ռուբլին՝ այդ ամենը սադրանքի և ֆանտազիայի ոլորտներից է»,- ասել է Սվետովը։
Քաղաքագետը նշել է, որ Փաշինյանը 2018 թվականից ի վեր ամեն ինչ անում է Ռուսաստանի ազդեցության գոտուց դուրս գալու համար։ Միաժամանակ նա չի շտապում հեռանալ Հայաստանի համար շահավետ տնտեսական միություններից, օրինակ ԵվրԱզԷՍ-ից։ Հայաստանի վարչապետը հստակ նպատակ ունի, որն է երկիրը վերակողմնորոշել դեպի Արևմուտք, բայց քանի դեռ չեն անդամակցել ԵՄ-ին, օգտվում են այն առավելություններից, որոնք տալիս են այդ միություններին անդամակցությունը։
Հիշեցնենք, որ ավելի վաղ Հայաստանի իրավապահները հայտնել էին, որ երկրում կանխվել է պետական հեղաշրջման փորձ, որը նախապատրաստել էին հանրապետության մի քանի քաղաքացիներ, այդ թվում Լեռնային Ղարաբաղից եկածներ։ Ազգային անվտանգության ծառայությունը նաև հայտարարել էր, որ խումբը նախապատրաստվել էր Ռուսաստանում։
Նյութը հրապարակման պատրաստեց Կամո Խաչիկյանը
