Պայթյուն՝ Հրազդան ՋԷԿ-ի տարածքում գործող ձուլարանում․ վիրավորներ կան

Այսօր  արտակարգ դեպք է տեղի ունեցել Կոտայքի մարզում։ Ժամը 16:50-ի սահմաններում Հրազդան ՋԷԿ-ի տարածքում գործող ձուլարանում պայթյուն է տեղի ունեցել, կան տուժածներ։

Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են «Հրազդան» բժշկական կենտրոնի շտապօգնության բժիշկների հերթապահ մի քանի խմբեր, ովքեր նշված վայրից 6 հոգու տարբեր աստիճանի մարմնական վնասվածքներով տեղափոխել են «Հրազդան» բժշկական կենտրոն։

Դեպքի վայրում հավաքված քաղաքացիները ասել են, որ վիրավորներից երկուսի ոտքերը եղել են անդամահատված։
 
Դեպքի փաստով քննչական վարչությունում նախաձեռնվել է քրեական վարույթ, պարզում է վիրավորների ինքնությունը։

Նախնական տեղեկություններ կան, որ պայթյունի հետևանքով մեկ հոգի մահացել է։