Կորտունով. ԵՄ առաքելության կարգավիճակը պետք է համաձայնեցվի Բաքվի հետ
ՔԱՂԱՔԱԿԱՆՈՒԹՅՈՒՆ
Հայ-ադրբեջանական սահմանը սահմանազատելիս և սահմանագծելիս անհրաժեշտ է որոշել և համաձայնեցնել Բաքվի հետ Հայաստանում եվրոպացի դիտորդների կարգավիճակը, news.ru-ի հետ զրույցում ասել է Ռուսաստանի միջազգային հարաբերությունների խորհրդի գիտական ղեկավար Անդրեյ Կորտունովը։ Նրա խոսքով, դժվար թե արևմտյան սահմանապահները մնան Հայաստանում: «Եթե սահմանազատման ու սահմանագծման երկկողմանի քայլեր սկսվեն, ապա չի կարող լինել այնպես, որ սահմանի մի կողմում լինեն միջազգային միջնորդներ, իսկ մյուս կողմից չլինեն։ Միջնորդությունը պետք է ներառի երկու կողմերի համաձայնությունը: Եվ ընդհանրապես անհասկանալի է, թե ի՞նչ գործառույթ են իրականացնելու եվրոպացի սահմանապահները։ Անհասկանալի է, թե դա ի՞նչ տեսքով կլինի: Սա մի հարց է, որը պետք է քննարկվի և համաձայնեցվի Ադրբեջանի հետ երկկողմ բանակցություններում»,- կարծիք է հայտնել Կորտունովը։
Նրա խոսքով, նման պայմաններում եվրոպացի դիտորդները դժվար թե երկար մնան Հայաստանում։ Կորտունովը նաև նշել է, որ ԵՄ-ն այն կառույցը չէ, որը կարող է երաշխավորել Հայաստանի անվտանգությունը, քանի որ եվրոպացիները չունեն երկիրը պաշտպանելու ռեսուրսներ և կարողություններ։
Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան էր ասել, որ Ռուսաստանն ԱԳՆ-ի միջոցով Ֆրանսիային չի ծանուցել Հայաստանում ԵՄ առաքելությունը սահմանափակելու անհրաժեշտության մասին, այլ անմիջականորեն հրապարակային դաշտում հայտնել է իր դիրքորոշումն այդ հարցում։ Նա վստահություն էր հայտնել, որ Հայաստանում ԵՄ առաքելության խնդիրն է ապակայունացնել ռազմաքաղաքական իրավիճակը տարածաշրջանում։ Նրա կարծիքով ԵՄ երկրները մտադիր են հանրապետությունը վերածել «աշխարհաքաղաքական մրցակցության մեկ այլ ասպարեզի»։
Նյութը հրապարակման պատրաստեց Կամո Խաչիկյանը
