Ադրբեջանը, լինելով ագրեսոր պետություն, ուզում է հայ ժողովրդին վզին փաթաթել ագրեսորի պատժամիջոցները. Օհանյան

ՀՀ իշխանությունները, եթե ամուր կառավարման համակարգ ունենային և իրենց տեղն ունենային՝ որպես ինքնիշխան պետություն, առաջինն իրենք պետք է արձագանքեին Ադրբեջանի նախագահի օգնական Հիքմեթ Հաջիևի հայտարարությանը: Այս մասին, այսօր Արցախի ներկայացուցչության մոտ լրագրողների հետ զրույցում հայտարարեց «Հայաստան» խմբակցության ղեկավար Սեյրան Օհանյանը:

Անդրադառնալով Հաջիևի հայտարարությանը՝ Օհանյանը շեշտեց՝ Ադրբեջանը թող զբաղվի իր ներքին հարցերով. «Ադրբեջանն իրավունք չունի զբաղվել հայության, Հայաստանի և Արցախի հարցերով։ Ադրբեջանը, լինելով հանցագործ, ագրեսոր պետություն, ուզում է Հայաստանի ժողովրդի վզին փաթաթել ագրեսոր պետության նկատմամբ իրականացվող տարբեր պատժամիջոցներ, դրանք բոլորը պետք է իրականացվեն Ադրբեջանի նկատմամբ»,-ասաց Սեյրան Օհանյանը:

Հիշեցնենք, որ Ադրբեջանի նախագահի օգնական Հաջիևն ակնարկել էր, որ պետք է սահմանափակումներ կիրառվեն Հայաստանի զինված ուժերի նկատմամբ։

«Եթե ուշադրություն դարձնենք Երկրորդ համաշխարհային պատերազմից հետո միջազգային հարաբերությունների համակարգին, ապա կտեսնենք, որ կան շատ փոքր թվով պետություններ, որոնք օկուպանտներ և ագրեսորներ են, որոնց թվում է նաև Հայաստանը», հայտարարել էր Հիքմեթ Հաջիևը։

Հիշեցնելով, որ Իրաքի և Քուվեյթի պատերազմից հետո որոշակի սահմանափակումներ են կիրառվել՝ կապված իրաքյան զինված ուժերի զարգացման հետ, նա նշել էր, որ նմանատիպ սահմանափակումներ պետք է կիրառվեն նաև Հայաստանի զինված ուժերի նկատմամբ։

Հաջիևը նաև նշել է, որ «վաղուց եկել է Մինսկի խումբը լուծարելու ժամանակը»․ «Այն, որ Հայաստանը օրակարգում է պահում այս ինստիտուտը և շարունակում է ջանքերն այս ուղղությամբ, հուշում է, որ Երևանը փորձում է անավարտ հակամարտության տպավորություն ստեղծել՝ իր արևմտյան աջակիցների հետ միասին՝ փորձելով իր ձեռքում պահել ազդեցության որոշակի միջոց»։