Անձրևը՝ իշխանությունների ձախողման ցուցիչ

Երեկ Երևանում տեղացած հորդառատ անձրևը հերթական անգամ փաստեց, գործող իշխանություններն արտակարգ իրավիճակներին արձագանքելու հմտություն, կարողություներ չունեն, ողջ թափով ձախողել են իրենց պարտականությունները։ Մայրաքաղաքում ընթացող բուռն շինարարության ֆոնին Երևանում, հատկապես կենտրոնում բացակայում են հեղեղատարները, իսկ ցանկացած բնության տարերք կարող է աղետի վերածվել։

Հեղեղատարների գոյությունը, քաղաքաշինական նորմերի պահպանումը հենց իշխանության պարտականությունն է, բայց շարքային ապիկարների այդ բազմությունը հմուտ է միայն պարգևավճարներ դուրս գրելու հարցում, ցանկացած այլ դեպքում անճարակի տպավորություն են թողնում։

Տակավին օրեր առաջ վարչախմբի պարագլուխը կառավարության նիստում մունաթ էր գալիս տնտեսվարողների վրա, թե շատերը չեն մաքրում իրենց խանութների, սրահների դիմացը։ Չի բացառվում, որ հաջորդ նիստում էլ մեղադրի տնտեսավարողներին հեղեղատարային համակարգ կառուցելու համար։

Իսկ ո՞ւմ է պետք նման պետությունը, նման իշխանությունը, որը զբաղված է միայն ժողովրդի հաշվին պարազիտանալով։ Օր առաջ պետք է ազատվել փաշինյանական խառնամբոխից, որի գործունեությունն աղետ ու ավեր է բերում բոլոր ոլորտներում։

Էմմա Աբովյան