ՀՀ աշխատանքի և սոցիալական հարցերի նախարարության «114» թեժ գծով մեկ ամսում ստացվել է 5409 զանգ
ՀԱՍԱՐԱԿՈՒԹՅՈՒՆ
ՀՀ աշխատանքի և սոցիալական հարցերի նախարարության «114» Թեժ գիծ ծառայության միջոցով ապրիլին ստացվել է 5409 զանգ: Այս մասին «Արմենպրես»-ին տեղեկացրեցին ՀՀ աշխատանքի և սոցիալական հարցերի նախարարության հասարակայնության հետ կապերի բաժնից:
Ստացված զանգերից 1273-ը վերաբերել է կենսաթոշակին առնչվող ընդհանուր ճշգրտող տեղեկատվության ստացմանը, 539 զանգ ընտանիքի անապահովության, 243-ը՝ երեխայի խնամքի, 243-ը՝ երեխայի ծննդյան միանվագ նպաստի, 595-ը՝ երեխայի ծննդյան միանվագ նպաստի առցանց դիմումի ներկայացման, 123-ը՝ մայրության նպաստի տրամադրմանը: 112 զանգ ստացվել է կենսաթոշակի կուտակային բաղադրիչին վերաբերող հարցերին:
Քաղաքացիները զանգահարել են նաև բժշկասոցիալական փորձաքննության, ավանդի փոխհատուցման և ոլորտում առկա այլ հարցերին առնչվող տեղեկատվություն ստանալու համար:
Ապրիլ ամսին ստացվել է 47 բողոք, որից 3–ն ուղղված է եղել Բժշկասոցիալական փորձաքննության հանձնաժողովին, 7-ը՝ Սոցիալական աջակցության տարածքային բաժիններին, իսկ 37-ը՝ Սոցիալական ապահովության պետական ծառայության տարածքային բաժիններին:
Թեժ գիծ զանգահարած քաղաքացիների բարձրացրած հարցերի մոտ 90 տոկոսը տեղում լուծում է ստացել, իսկ լրացուցիչ ուսումնասիրություն պահանջող մյուս հարցերին համապատասխան ընթացք է տրվել:
