Ձախողված կառավարման հետևանքները

Հայաստանի գործող իշխանությունները ձախողել են պետության կառավարումն ամենատարբեր ոլորտներում, կենցաղային հասարակ հարցերում, իսկ մեղավորներ նշանակում են բոլորին, բայց ոչ երբեք իրենց։

Սոցիալական ցանցերը հեղեղված են ջրամատակարարման, էլեկտրամատակարարման խնդիրների, պարբերական անջատումների մասին տեղեկություններով, իշխանական քարոզիչներն էլ խոսում են «սաբոտաժի» մասին, մեղադրում ռուսական կամ ֆրանսիական ծագմամբ ընկերություններին։

Որ Հայաստանի էլեկտրական ցանցերը կամ «Վեոլիա»-ն երբեք էլ աչքի չեն ընկել արդյունավետ աշխատանքով, որևէ մեկի համար նորություն չէ, բայց նրանց անարդյունավետ աշխատանքն էլ պետական կառավարման ձախողման հետևանք է։

Տարիներ շարունակ հանրությունը, փորձագետները, լրագրողները փաստել են խնդիրները, բայց իշխանությունները մատը մատին չեն խփել այդ ընկերություններին պատժելու, անհրաժեշտ ներդրումներն ապահովելու, ենթակառուցվածքների մաշվածությունը վերացնելու, կորուստները նվազեցնելու համար։ Արդյունքում, հոսանքն անջատվում է օպերային ներկայացման, ֆուտբոլային միջազգային հանդիպման, մեկ անգամ էլ՝ կառավարության նիստի ընթացքում։ Իսկ դա ուղիղ վտանգում է ՀՀ անվտանգությունն ու հեղինակությունը, ցուցադրում, թե որքան ձախողված պետություն է Հայաստանը Նիկոլ Փաշինյանի ու նրա թիմի կառավարման օրոք։

Մանիկ Վարդանյան