Վիգեն Քոչարյանը վստահ է Վրաստանում հայ համայնքի եկեղեցական սեփականության խնդիրների լուծման հարցում
ՀԱՍԱՐԱԿՈՒԹՅՈՒՆ
ՀՀ արդարադատության փոխնախարարը Վրաստանում հայ համայնքի եկեղեցական սեփականության և այլ խնդիրների լուծման ուղղությամբ կարևորում է վրացական իշխանությունների կառուցողական մոտեցումը: «Արմենպրես»-ի հաղորդմամբ`մայիսի 8-ին տեղի ունեցած «Հայաստանում, Վրաստանում և աշխարհում կրոնի կամ համոզմունքի ազատության արդի հիմնախնդիրները» խորագրով համաժողով ից առաջ լրագրողների հետ զրույցում ՀՀ արդարադատության նախարարի տեղակալ Վիգեն Քոչարյանն ասաց, որ մեր հարևան պետությունում հայ համայնքը պարբերաբար բարձրացնում է կրոնական պահանջմունքների հետ կապված որոշ հարցեր, որոնք պետք է լուծվեն միջազգային առաջավոր փորձի հիման վրա:
«Այդ առումով` կարևոր է կառուցողական մոտեցման անհրաժեշտությունը, որն իմ գնահատմամբ` վրացական իշխանությունների կողմից առկա է: Խնդիրների հաղթահարման համար հարկավոր է մեր և վրացական կողմի համապատասխան հետևողական աշխատանքների իրականացումը: Հարցադրումներ լինում են կապված եկեղեցական սեփականության և այլ հարցերի հետ, սակայն ինձ չի թվում, որ դրանք սկզբունքային բնույթ են կրում»,- ասաց փոխնախարարը` հավելելով, որ այն բարիդրացիական հարաբերությունները, որոնք կան հարևան պետության հետ իրենց թույլ են տալիս ենթադրել, որ նման կարգի ցանկացած խնդիր վաղ թե ուշ կգտնի իր լուծումը:
