ՆԱՏՕ-ն նոր սադրանք է մտմտում՝ օգտագործելով Հայաստանին

Հայաստանը համաձայնվել է արտգործնախարարի մակարդակով մասնակցել ՆԱՏՕ-ի գործընկերների հետ հանդիպանը Վաշինգտոնի գագաթնաժողովի շրջանակներում։ Նախօրեին ադրբեջանական «Թուրան» գործակալությունը տեղեկություն էր հայտնել, որ ԱՄՆ-ը Հայաստանին և Ադրբեջանին հրավիրել է մասնակցել գագաթնաժողովին։

Հայասատնի վարչապետի աշխատակազմից տեղեկությունը ո՛չ հերքել, ո՛չ հաստատել էին, իսկ ԱԳՆ-ից ընդհանրապես մեկ օրից ավելի, որևէ տեղեկություն ստանալն անհնարին գործ էր դարձել։ Երեկ արդեն Բաքվում ԱՄՆ փոխպետքարտուղար Ջեյմս Օ՚ Բրայենը հաստատել է, որ Վաշինգտոնը Հայաստանի և Ադրբեջանի արտգործնախարարներին հրավիրել է մասնակցելու ՆԱՏՕ-ի գործընկերների հավաքին 30 այլ երկրների շարքում և, ամենայն հավանականությամբ, արտգործնախարարները նաև համատեղ հանդիպում կունենան քննարկելու հակամարտության կարգավորումը։

Արևմուտքի այս աննախադեպ ակտիվությունը Հայաստանի ուղղությամբ, վկայում է, որ ԱՄՆ-ն ցանկանում է ամեն գնով արագացնել խաղաղության պայմանագրի ստորագրումը, ընդ որում ի հաշիվ Հայաստանի Հանրապետության, առավել ևս ցանկանում են պայմանագրի ստորագրումն ու բանակցություններն անցկացնել արևմտյան հարթակներում՝ այդ կերպ նվազեցնելով Ռուսաստանի ազդեցությունը, իսկ խաղաղության պայմանագրի վերջնական ստորագրումից հետո, Ռուսաստանին տարածաշրջանից դուրս մղելն ընդամենը տեխնիկայի հարց է դառնալու։

Թե ի՞նչ պատասխան կտա Մոսկվան, թերևս պարզ է, որևէ կերպ նա իր կենսական շահերի գոտին չի պատրաստվում զիջել։

Էմմա Աբովյան