Նաիրիտ 2 ՓԲԸ-ն օգտվել է նախկին աշխատակիցների ծանր սոցիալական վիճակից և կնքել նրանց շահերին ակնհայտ դեմ գործարք. փաստաբան

Նաիրիտի նախկին աշխատակիցների աշխատավարձերը վճարել են՝ պայմանով, որ նրանք հրաժարվեն աշխատավարձերի ուշացման համար օրենքով նախատեսված տույժերից:

Past.am-ի հետ զրույցում գործարանի աշխատակիցների շահերի պաշտպան Տիգրան Սարգսյանն ասաց, որ նման պայմանն իրավաչափ չէ:

Ըստ փաստաբանի՝ օրենքին հակասող պայմանագրերը դատական կարգով ենթակա են անվավեր ճանաչման: Սարգսյանի խոսքով՝ Նաիրիտ 2 ՓԲԸ-ն օգտվել է նախկին աշխատակիցների ծանր սոցիալական վիճակից և կնքել նրանց շահերին ակնհայտ դեմ գործարք: «Նման գործարքները, համաձայն օրենսդրության, ստրկացուցիչ են և պետք է անվավեր ճանաչվեն»,-հավելեց մեր զրուցակիցը:

Իրավաբաանը հայտնեց, որ գործը քննվում է Շենգավիթ վարչական շրջանի ընդհանուր իրավասության դատարանում:

«Ապրիլի 27-ին դատավորը դատական նիստը հետաձգեց 5 ամսով` նշանակելով այն սեպտեմբերի 22-ին: Դատավոր Նարինյանն իր գործողություններով կասկածի տակ է դնում իրավունքի դատական պաշտպանության արդյունավետությունը: Սա դատավորի վարքագծի կանոնի խախտում է: Մենք այսօր դիմեցինք դատավորների ընդհանուր ժողովի էթիկայի և կարգապահական հարցերի հանձնաժողովին՝ դատավորին պատասխանատվության ենթարկելու նպատակով կարգապահական վարույթ հարուցելու պահանջով»,-ասաց Տիգրան Սարգսյանը:

Լևոն Փանոսյան