Ինչո՞ւ FlyOne Armenia-ի ինքնաթիռը չի կարողացել վայրէջք կատարել Քիշնևի օդանավակայանում
ՀԱՍԱՐԱԿՈՒԹՅՈՒՆ
Քիչ առաջ տելեգրամյան ալիքներում լուրեր տարածվեցին, որ հայկական FlyOne ընկերության օդանավերից մեկին չի հաջողվել վայրէջք կատարել Քիշնևի օդանավակայանում և ստիպված է եղել շարունակել թռիչքը դեպի Բուխարեստի օդանավակայան, սակայն այնտեղ ևս թույլ չեն տվել վայրէջք կատարել։
Ըստ տելեգրամյան ալիքների տարածած տեղեկատվության՝ ինքնաթիռը վերադառնում է Երևան:
«Սա քաղաքական հետապնդում է»,- տելեգրամյան ալիքներից մեկում նման կարծիք էր հրապարակվել։
Ո՞րն է խնդիրը․ MediaHub-ը փորձեց պարզել՝ զրուցելով Flyone Armenia ավիաընկերության տնօրենների խորհրդի նախագահ Արամ Անանյանի հետ։
«Պատճառը տեխնիական է՝ կապված բացառապես չվերթի կոդի հետ, և սա մեր կանոնավոր չվերթը չէ։ Սա որպես ամբողջական ու վերջնական տեղեկություն»,- նշեց Անանյանը։
Նշենք, որ տելեգրամյան ալիքներում ասվում է նաև, որ Քիշնևը հրաժարվել է ընդունել չարտերային չվերթը, որով մոլդովական «Հաղթանակ» ընդդիմադիր դաշինքի համագումարի մասնակիցները Մոսկվայից Երևանով վերադառնում էին Մոլդովա։
Նարե Գնունի
