Արարատ Միրզոյանը ստում է և մանիպուլացնում Հայաստանի քաղաքացիներին․ Ստեփան Դանիելյան

Քաղաքագետ Ստեփան Դանիելյանը գրել է․ 

«Միրզոյանը պնդել է, թե Թուրքիան պահանջներ չունի Հայաստանից:

Արարատ Միրզոյանը ստում է: Թուրքիան մանիպուլյացիա է անում, և դա լավ հասկանում է Միրզոյանը և, իր հերթին, մանիպուլացնում է Հայաստանի քաղաքացիներին:

Ո՞րն է Թուրքիայի մանիպուլյացիան:

Թուրքիայի նախագահն ու մյուս պետական պաշտոնյաները բազմիցս հայտարարել են, որ համաձայն են այն բոլոր պահանջներին, որոնք ներկայացնում է Ադրբեջանը, և խաղաղություն կարող է տիրել Ադրբեջանի պայմաններով՝ կհամաձայնեն Հայաստանի հետ հարաբերություններ կառուցել, եթե լինի Ադրբեջանի համաձայնությունը:

Ադրբեջանի նախագահն ու մյուս պետական բարձրաստիճան ղեկավարները ներկայացրել ու ներկայացնում են իրենց պահանջները՝ ընդհուպ մինչև Հայաստանի տարածքների 50 տոկոսը, սահմանադրության փոփոխությունը, հրաժարումը Ցեղասպանությունից, միջանցքի տրամադրում, այսպես կոչված «Խոջալուի ցեղասպանության» ճանաչում և այլն ․․․ այդ պահանջները կարելի է երկար թվարկել: 

Այդ բոլորը նաև Թուրքիայի պահանջներն են, որոնք Ադրբեջանի միջոցով են ներկայացնում»։