Փորձում են խանգարել արցախցիների մասնակցությունը երթին․ արցախցի պատգամավոր

Արցախցիներին ասվել է, եթե մասնակցեն «Տավուշը հանուն հայրենիքի» շարժմանը, ապա կզրկվեն պետական աջակցությունից։ Համացանցում այս բովանդակությամբ տարբեր լուրեր են տարածվում։ Հասկանալի է, որ դա գործնականում այնքան էլ կիրառելի չէ։

Նախ ֆիքսել թե 100 հազար հոգուց քանիսը, որ ակցիային է մասնակցել, այնքան էլ դյուրին չէ։ Բացի այդ, աջակցությունը տրամադրվում է բոլորին՝ առանց բացառությունների։

Սա, հավանաբար, արվում է, որ արցախցիների մոտ վախ առաջացնեն։ Հին, բայց դեռ աշխատող տեխնոլոգիա է։ Արցախցի պատգամավոր Մետաքսե Հակոբյանը 1or.am-ին ասաց, որ իրեն նմանօրինակ տեղեկություններ հասնում են, բայց այլ կառույցների հետ կապված։

«Պետական ծրագրերի հետ կապված տեղեկություն չունեմ, բայց կան կազմակերպություններ, որոնք զգուշացրել են, որ եթե իրենց շահառուները մասնակցեն երթին, ապա կզրկվեն աջակցությունից։ Ինչպես նաև կան համայնքներ, որտեղ ղեկավարները ոչ ուղիղ, բայց նման բան են հասկացնում։ Երեկ եղել են դեպքեր, որ արցախցիներին հավաքել են, տարբեր ծրագրեր են խոստացել, բնակարաններ, գումար և նմանատիպ առաջարկներ։ Տարբեր միջոցներով փորձում են խանգարել արցախցիների մասնակցությունը երթին»,- ասաց Հակոբյանը։

Պատգամավորի խոսքով այս գործելաոճն այնքան էլ հաջողություն չունի։ Երթում այս պահին էլ շատ արցախցիներ կան։

«Հատկապես երեկ, երբ Արցախի թեմակալ առաջնորդը հայտարարությամբ հանդես եկավ և իր մասնակցության մասին հայտնեց, այդ ժամանակ բավականին մեծ թվով արցախցիներ միացան։ Մենք այստեղ չենք դիտարկում Արցախի հարց, Հայաստանի հարց, Տավուշի հարց։

Սա հայրենիքի գոյաբանական խնդիր է, որտեղ եկեղեցին կոչնակը հնչեցրել է և իր զավակները, զգալով այդ վտանգը, միանում են շարժմանը, որպեսզի և՛ պաշտպանված լինեն, և պաշտպանեն իրենց հայրենիքը»,- նշեց Հակոբյանը։

Անձամբ ինքը եղել է երթի շարքերում, երեկ էլ Արցախի Սրբազանի խոսքից հետո պաշտոնական հաղորդագրությամբ են դա հաստատել։ Արցախցի պատգամավորը հայտարարում է՝ որպես հայ եկեղեցու զավակներ այլ տեղ չունենք գնալու։