Ռուսական զորախումբը հեռանում է Լեռնային Ղարաբաղից. ո՞րն է հապշտապության պատճառը 

Ռուսական խաղաղապահ զորախումբը լքում է Լեռնային Ղարաբաղի տարածքը և հեռանում Ռուսաստան։ Ադրբեջանական լրատվամիջոցների երեկ տարածած տեղեկությունը հաստատել են թե՛ Մոսկվան և թե՛ պաշտոնական Բաքուն։ Ադրբեջանի նախագահի օգնական Հիքմեդ Հաջիևը նշել է, թե երկու երկրների ղեկավարությունները որոշում են կայացրել Ադրբեջանի տարածքից ռուսաստանցի խաղաղապահների վաղաժամկետ դուրսբերման մասին, գործընթացն արդեն սկսվել է։ Ռուս խաղաղապահները մի քանի փուլով լքում են Արցախի տարածքը։ Փաստացի այս կերպ փակվում է կարևոր մի հանգրվան Արցախի պատմության մեջ։ Ռուս խաղաղապահների դուրսբերմամաբ միջազգային վերջին ներկայությունը Արցախում ավարտված է, և արցախցիների ունեցվածքն ու գույքը այլևս բաց են ադրբեջանցիների թալանի համար, առավել ևս, որ արդեն շաբաթներ առաջ տեղեկություն էին հայտնել, որ ադրբեջանցիները մուտք են գործում արցախցիների՝ նախկինում կնքված տները և տանում ամենաթանկարժեք իրերը։ Ռուսաստանի դաշնության խորհրդի արտաքին հարաբերությունների հանձնաժողովի նախագահ, նախկին փոխարտգործնախարար Գրիգորի Կարասինի խոսքով՝ ռուսաստանցի խաղաղապահների դուրսբերումը Հայաստանի վարչապետ Նիկոլ Փաշինյանի կողմից այդ տարածքը Ադրբեջանի մաս ճանաչելու տրամաբանական հետևանքն է։ Մի կողմից՝ Ռուսաստանը կարող է, իհարկե, փորձել մեղքը գցել միայն Հայաստանի իշխանությունների վրա, բայց փաստն այն է, որ ստեղծված իրավիճակի համար իրենք ևս իրենց մեղքի բաժինն ունեն, քանի որ ժամանակին բավարար չափով չեն պաշտպանել Լեռնային Ղարաբաղի բնակչությանը, ինչի պարտավորությունը, ի դեպ, ունեին նույն նոյեմբերի 9-ի հայտարարությամբ, իսկ հիմա իրենց իսկ ձեռքով Նիկոլ Փաշինյանին հնարավորություն են տալիս վերջնականապես փակելու Լեռնային Ղարաբաղի էջը և այլևս հուսահատության մատնելու արցախցիներին։ Մի կողմից՝ սա ձեռնտու զարգացում է Փաշինյանի համար, նաև՝ Ռուսաստանի հեռանալուց հետո տարածաշրջանում շարունակելու է ամրապնդվել Թուրքիան։ Արևմուտքը հենց այդ երկիրն է տեսնում որպես հարավկովկասյան հեգեմոն, ուստի Ռուսաստանի հեռանալու պարագայում, իսկ Փաշինյանը մտադիր է Հայաստանից հեռացնել նաև 102-րդ ռազմակայանը, տարածաշրջանը վերջնականապես կհայտնվի Թուրքիայի ազդեցության գոտում։

Հայկ Աբգարյան