Երևանում մի մեծ թաղամասի շինարարության ներդրումն ավելի մեծ է, քան այդ դրամաշնորհը․ Թարվերդյանը՝ Հայաստանին տրամադրվող ԵՄ 270 մլն-ի մասին

Շատերն ավելի մեծ ակնկալիքներ ունեին այս հանդիպումից, շատերն ակնկալում էին, որ հենց այս հանդիպմամբ որոշվելու է, որ Հայաստանը մուտք է գործելու Եվրամիություն կամ ՆԱՏՕ, սակայն, ես որպես քաղաքական գործիչ շատ հանգիստ էի վերաբերվում այդ հանդիպմանը․ այս մասին Tert.am-ի հետ զրույցում ասաց «Միացյալ Հայաստան» կուսակցության հիմնադիր նախագահ Երվանդ Թարվերդյանը՝ անդրադառնալով այսօր Բրյուսելում կայացած Հայաստան-ԵՄ-ԱՄՆ եռակողմ հանդիպմանը։

«Մի շարք մարդիկ անհանգստանում էին այս հանդիպման համար, կապում այն արտաքին քաղաքականության վեկտորի փոփոխության հետ։ Ես դա ընթացիկ աշխատանքային հանդիպում եմ որակել, որի ընթացքում ԵՄ-ն դրամաշնորհ է տրամադրել մեզ։ Գնահատել, թե այդ 270 մլն եվրոն մեծ դրամաշնորհ է այդ 4 տարվա համար, իհարկե, դա այդպես չէ։ Այս փուլում, տեմպերի պայմաններում դա նորմալ դրամաշնորհ է, որը մի շարք ուղղվածություններ ունի և համոզված եմ՝ մի մեծ մասը կտրվի տեխնիկական օգնությանը տեսքով․ այսինքն՝ մասնագետներ կգան ու խորհրդատվություն կիրականացնեն»,- ասաց բանախոսը և հավելեց․

«Երևան քաղաքում մի մեծ թաղամասի շինարարության ներդրումը ավելի մեծ է քան այդ ներդրումը։ Կարելի է համարել, որ հերթական աշխատանքային հանդիպումն էր սա և ուռճացնել այն պետք չէր։ Եթե կան այլ բանավոր պայմանավորվածություններ, որ կառավարությունը, լրատվամիջոցները կամ ԵՄ-ն ու ԱՄՆ-ն չեն ներկայացնում, դա այլ հարց թեմա է»։

Նրա կարծիքով՝ հանդիպման ընթացքը պայմանավորված էր նրանով, որ Հայաստանը Եվրաինտեգրման հետ կապված աշխատանքներ է իրականացնում և կարելի է համարել սա հերթական փուլային աշխատանքն էր։  «Ես որպես ՀՀ քաղաքացի ուրախ եմ ցանկացած աջակցության համար, որովհետև միայն ԵՄ-ն չի, որ աջակցում է ՀՀ-ին, եթե վերցնենք արաբական աշխարհը, ապա շատ ներկայացուցիչներ միլիարդավոր դոլարներ են պատրաստ ներդնել Հայաստանի տնտեսության մեջ, սակայն այսպիսի մեծ աժիոտաժով ոչ ոք  դա չի ներկայացնում»,- ընդգծեց Թարվերդյանը։

Հարցին՝ այդ  բուռն արձագանքն ինչո՞վ է պայմանավորված, նա նշեց․ «ՀՀ քաղաքական դաշտը մեկ սև ու սպիտակների է բաժանվում, մեկ հների ու նորերի հիմա էլ տարօրինակ ձևով վտանգավոր բաժանում կա․ տարանջատում են ուզում անել Ռուսաստան և արևմուտք պրիզմայով։ Շատերը չեն հասկանում, որ մեր տարածաշրջանը չի սահամանփակվում Ռուսաստանով։ Ռուսաստանը մեր դաշնակիցն է, սակայն մենք ունենք ավելի մոտ այլ բարեկամ երկրներ տարածաշրջանում, օրինակ, Իրանի իսլամական հանրապետությունը, Չինաստանը, որոնք նույնպես հետաքրքրություններ ունեն Հայաստանում։  Շատերը փորձում են հարաբերությունը լավացնել մի պետության հետ մեկ այլ պետության հաշվին, որը ամենամեծ սխալն է մեր իրականության մեջ»,- ընդգծեց նա։

Թարվերդյանն ընդգծեց, որ մենք պետք է զարգացնենք մեր հարաբերությունները աշխարհի բոլոր պետությունների հետ և այդ գործընթացներում ոչինչ չանենք մի հարաբերության լավացումը մյուսի վատթարացման հաշվին։ «Շատ քաղաքական գործիչներ, որ նշում էին այսօր կարող է դրվի ՀԱՊԿ-ից դուրս գալու հարց դա կարելի է համարել ծիծաղելի։ Մարդիկ չեն պատկերացնում այն հարթակները, այն քննարկումները, որի շրջանակներում տնտեսական զարգացման հարցեր են քննարկվում, իրենց թվում է՝ այդ հարթակներում ամեն ինչ արագ ու մեկ օրում է լինում, ոչ մի խոշոր և լուրջ ծրագիր մեկ օրում, մեկ շաբաթում, կամ մեկ ամսում չի իրականացվում»,- հավելեց նա։

Նա նշեց, որ այսօր մեր տնտեսության համար Ամուլսարի մասով ներդրումն ավելի լուրջ ծրագիր է, քան ներդրման չափը միլիարդից ավելի է, իսկ դա 4 տարուց էլ ավելի շուտ կիրականացվի, քան այս ծրագիրը, մարդիկ սիրում են չափազանցնել, գնահատականներ տալ և անհեթեթ խոսել։

Հիշեցնենք, որ այսօր Բրյուսելում կայացավ ՀՀ վարչապետ Նիկոլ Փաշինյանի, Եվրոպական հանձնաժողովի նախագահ Ուրսուլա Ֆոն դեր Լեյենի և ԱՄՆ պետքարտուղար Էնթոնի Բլինկենի հանդիպումը, որի ժամանակ քննարկվեցին Հայաստանի զարգացմանը նպաստող եռակողմ համագործակցության ուղիները։