114 տարեկանում կյանքից հեռացել է աշխարհի ամենատարեց տղամարդը
ՄԻՋԱԶԳԱՅԻՆ
114 տարեկանում մահացել է աշխարհի ամենատարեց տղամարդը՝ Վենեսուելայի բնակիչ Խուան Վիսենտե Պերես Մորան։ Այս մասին հայտարարել է երկրի նախագահ Նիկոլաս Մադուրոն։
«114 տարեկանում մահացել է Խուան Վիսենտե Պերես Մորան, որը Գինեսի ռեկորդների գրքում գրանցվել է որպես աշխարհի ամենատարեց տղամարդ: Ես ցավակցում եմ նրա ընտանիքին և Էլ Կոբրե քաղաքի (երկարակյացն այդտեղ է ծնվել) բոլոր բնակիչներին»,- գրել է Մադուրոն X-ում:
Պերես Մորան մահացել է 114 տարեկան և 339 օրական հասակում՝ շնչառական բարդությունների պատճառով, հայտնում է El Nacional թերթը։
2022 թվականի փետրվարի 4-ին նա գրանցվել է Գինեսի համաշխարհային ռեկորդների գրքում որպես աշխարհի ամենատարեց տղամարդ։
Պերես Մորան իր երկարակեցությունը վերագրել է «մշտապես աշխատելուն, լավ հանգստին, վաղ քնելուն և ամեն օր մեկ բաժակ կոնյակ խմելուն»:
Տղամարդն ուներ 11 երեխա:
