Բաքվին անհանգստացնում է Հայաստան-Արևմուտք համագործակցությունը

ԵՄ-ի, Հայաստանի և ԱՄՆ-ի համատեղ համաժողովն ակնհայտորեն միակողմանի և կողմնակալ է և հիմնված է երկակի ստանդարտների վրա։ Այս մասին հայտարարություն է տարածել Ադրբեջանի արտաքին գործերի նախարարյունը՝ անդրադառնալով 2024 թվականի ապրիլի 5-ին Բրյուսելում կայանալիք ԵՄ-Հայաստան-ԱՄՆ համատեղ համաժողովին։

«Այս համաժողովը հայկական կողմին խաղաղ բանակցությունների մղելու փոխարեն տարածաշրջանում նոր բաժանարար գծեր և ազդեցության շրջանակներ է ստեղծում»,- ասված է հայտարարության մեջ։

Բաքուն նշել է, որ «բացահայտ հայանպաստ վերաբերմունքը կարող է այս երկրում վտանգավոր պատրանք ստեղծել, որ ԵՄ-ն և ԱՄՆ-ն կաջակցեն Ադրբեջանի դեմ հնարավոր սադրանքների հարցում»։

«Այդ դեպքում ԵՄ-ն և ԱՄՆ-ն կկիսեն պատասխանատվությունը Հայաստանի ցանկացած ապակայունացնող գործողությունների համար»,- ընդգծել է Ադրբեջանի ԱԳՆ-ն։

Բացի այդ, Ադրբեջանի ԱԳՆ մամուլի քարտուղար Այխան Հաջիզադեն մտահոգություն է հայտնել Ֆրանսիա-Հայաստան, Հունաաստան-Հայաստան ռազմական համագործակցության մասին։

«Բացի այդ, Խաղաղության եվրոպական հիմնադրամի շրջանակներում Հայաստանին ռազմական օգնություն տրամադրելու ծրագրերը և զեկույցները, որ ապրիլի 5-ին կայանալիք հանդիպումը ներառում է ռազմական բաղադրիչներ, լրացուցիչ մտահոգություններ են առաջացնում ու խաթարում տարածաշրջանում խաղաղության կառուցման ջանքերը», - ասվում է հայտարարության մեջ: