Մոսկվայի գնահատականը «Զվարթնոց» օդանավակայանից ռուս սահմանապահներին դուրս բերելու Երևանի որոշմանը

ՌԴ ԱԳՆ պաշտոնական ներկայացուցիչ Մարիա Զախարովան պատասխանել է այն հարցին, թե ինչպես է Մոսկվան գնահատում Երևանի «Զվարթնոց» միջազգային օդանավակայանից ռուս սահմանապահներին դուրս բերելու Երևանի որոշումը։

«Մենք իրականում տեսանք Հայաստանի ղեկավարության մեկնաբանությունն այս թեմայով: Ինչպես հասկացանք, համապատասխան ծանուցումն ուղարկվել է գերատեսչական գծով: Մենք դիվանագիտական ուղիներով ոչինչ չենք ստացել», - ճեպազրույցում ասել է Զախարովան։

Նա նշել է, որ Մոսկվան ելնում է նրանից, որ բոլոր որոշումները կայացվելու են միջգերատեսչական ուսումնասիրությունների արդյունքների հիման վրա։

«Ցանկանում ենք նշել, որ վերոնշյալ հայտարարությունը հայկական կողմից արվել է պաշտոնական Երևանի անբարյացակամ քայլերի և հայտարարությունների մի ամբողջ շարքի ֆոնին, և դժվար թե նման նախաձեռնությունը համապատասխանի Հայաստանի և նրա քաղաքացիների անվտանգության շահերին, հատկապես հաշվի առնելով այն խնդիրները, որոնք երկար տարիներ ուս-ուսի տված արդյունավետ կերպով կատարել են ռուս և հայ սահմանապահները»,- ասել է Զախարովան։