Սպանություն Տավուշի մարզում. դեպքի վայրում արյան հետքեր կան

Մարտի 18-ին սպանություն է տեղի ունեցել Տավուշի մարզում:

ՀՀ քննչական կոմիտեի տարածած հաղորդագրության համաձայն՝ մարտի 18-ին՝ ժամը 23.45-ին, «Բերդ» Բ/կ-ից հաղորդում է ստացվել, որ «ագոնալ վիճակ» ախտորոշմամբ բուժօգնության է տեղափոխվել 38-ամյա Վրեժ Մաթեւոսյանը եւ «կլինիկական մահ» ախտորոշմամբ՝ 28-ամյա Գագիկ Ճաղարյանը:

Ձեռնարկված անհետաձգելի գործողությունների արդյունքում պարզվել է դեպքի վայրը, որտեղ կատարվել է զննություն, հայտնաբերվել արնանման հետքեր։

Նախնական տվյալներով՝ ծակող-կտրող առարկայով մարմնական վնասվածք է պատճառվել Գ.Ճաղարյանի սրտի շրջանում, ինչի հետեւանքով վերջինս մահացել է, եւ Վ.Մաթեւոսյանին՝ հետույքի շրջանում՝ պատճառելով ծանր մարմնական վնաս։

Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի եւ ՀՀ քրեական օրենսգրքի 112-րդ հոդվածի 1-ին մասերի հատկանիշներով։

Մշակվել է քննչական պլան, առաջ քաշվել աշխատանքային վարկածներ, որոնք ստուգելու ուղղությամբ կատարվում են անհրաժեշտ քննչական եւ օպերատիվ-որոնողական միջոցառումներ։ Նշանակվել են փորձաքննություններ։

Որոշ տեղեկություններով սպանվածն ու մարմնական վնասվածք ստացածը ընկերներ են: