Ռուսաստանում տղամարդը սպանել է ՀՀ քաղաքացուն, որպեսզի չվերադարձնի 1 մլն ռուբլի պարտքը
ՀԱՍԱՐԱԿՈՒԹՅՈՒՆ
ՌԴ Կրասնոյարսկի երկրամասի Աչինսկ քաղաքի երկու բնակիչ բերման են ենթարկվել մեծ ֆինանսական պարտքի պատճառով ՀՀ քաղաքացու սպանության մեղադրանքով։ Այս մասին այսօր՝ հունվարի 17-ին, հայտնել է Կրասնոյարսկի երկրամասի և Խակասիայի քննչական կոմիտեն, գրում է krsk.kp.ru-ն։
Անցյալ տարվա դեկտեմբերի 23-ի առավոտյան ոստիկանությունը հաղորդագրություն է ստացել, որ Շախտյորսկայա-Սևերնայա փողոցում տղամարդու դի է հայտնաբերվել, ամեն ինչ սպանության մասին է վկայում։ Սպանվածը Հայաստանի 75-ամյա քաղաքացի էր, որը ողբերգությունից ընդամենը մի քանի ժամ առաջ պետք է հայրենիք մեկներ։
Քրեական հետախուզության աշխատակիցները պարզել են, որ տարեց տղամարդը բուժման նպատակով Աչինսկ էր գալիս արդեն մի քանի տարի։ Սակայն գործը չի սահմանափակվել միայն հիվանդանոց ուղևորություններով. սիբիրյան քաղաքում նա ընկերներ է ձեռք բերել, որոնց տոկոսով գումար է տվել։ Պարտապաններից մեկը տեղի 55-ամյա բնակիչ էր։
Աչինսկի բնակիչը ՀՀ քաղաքացուն մոտ մեկ միլիոն ռուբլու պարտք է ունեցել. գումարը չվերադարձնելու համար տղամարդը նախկինում դատապարտված 36-ամյա ընկերոջն առաջարկել է միասին «հարցը լուծել»։ Նման «աշխատանքի» համար պարտապանը խոստացել է վճարել 50 հազար ռուբլի։
Երեկոյան կասկածյալները պարտքը մարելու պատրվակով պարտատիրոջը բերել են առանձնատուն։
Այնտեղ տղամարդկանցից մեկը վերցրել է փայտի կտորը և հարվածել հայի գլխին, որից հետո երկրորդ հարձակվողը նույնպես փայտով մի քանի անգամ հարվածել է տղամարդուն»,- հայտնում է Քննչական կոմիտեի մամուլի ծառայությունը։
Տղամարդը կորցրել է գիտակցությունը։ Հարձակվողները նրան գցել են մայրուղու մոտ գտնվող փոսը, որտեղ տղամարդը մահացել է։ Կասկածյալներն այժմ կալանքի տակ են։ Հարուցվել է քրեական գործ:
