Պարեկները բերման են ենթարկել ՀՀ ՊՆ պայմանագրային զինծառայողների

Երեկ՝ դեկտեմբերի 5-ին, հերթական օպերատիվ տվյալներն են ստացվել վաշտում և 2-րդ դասակի հրամանատար Գևորգ Գյուրջյանը, պարեկ Ռոման Թառոյանը, կրտսեր պարեկ Գուրգեն Գրիգորյանը ծառայության ժամանակ ժամը 07:30-ի սահմաններում Երևան Մեղրի ավտոճանապարհի 143 կմ հատվածում նկատում են Mercedes մակնիշի ավտոմեքենան, որի վերաբերյալ օպերատիվ տեղեկություններ էին ստացել, որ ավտոմեքենայում գտնվողների մոտ հնարավոր է թմրանյութ լինի:

Ինչպես հայտնում է shamshyan.com-ը, պարեկները վարորդ՝ Արցախ Հանրապետության քաղաքացի 30-ամյա Նարեկ Հ.-ին, ուղևորներ՝ Արցախի Հանրապետության քաղաքացիներ 31-ամյա Նարեկ Զ.-ին և 21-ամյա Արման Գ.-ին թմրանյութ պահելու, կրելու և օգտագործելու անմիջականորեն ծագած հիմնավոր կասկածի հիմքով ձերբակալում ու տեղափոխում են ոստիկանության Վայքի բաժին:

Արդեն անձնական խուզարկությամբ Նարեկ Զ.-ի մոտ հայտնաբերվում է 3.64 գրամ ընդհանուր քաշով թմրանյութի նմանվող չորացված և մանրացված դեղնականաչավուն զանգված, Արման Գ.-ի մոտ հայտնաբերվում է 7.79 գրամ ընդհանուր քաշով թմրանյութի նմանվող չորացված և մանրացված դեղնականաչավուն զանգված ու ներսից ծխուկի հետքով ապակյա կաթուցիչ՝ 3.78 գրամ զանգվածով:

Ֆոտոլրագրողի տեղեկություններով նշված անձինք բոլորը ծառայում են ՀՀ ՊՆ N զորամասում, որպես պայմանագրային զինծառայողներ, ինչի համար էլ կազմված փաստաթղթերը ոստիկանության Վայքի բաժնից ներկայացվել է Հայաստանի Քննչական կոմիտեի զինվորական քննչական գլխավոր վարչության 8-րդ կայազորային քննչական բաժին, որտեղ դեպքի փաստով նախաձեռնվել է քրեական վարույթ: