Ե՞րբ եք խոստացել երեւանցիներին, որ ընտրությունից անմիջապես հետո կայանատեղիների վարձը բարձրացնելու եք 13 անգամ. Ղազարյան

Կայանատեղիների վճարը բարձրացնելու որոշումը Երեւանում քաղաքային իշխանություն ձեւավորված ՔՊ-ի եւ «Հանրապետություն» կուսակցության որի՞ նախընտրական ծրագրից է բխում: Այս մասին, այսօր՝ դեկտեմբերի 1-ին, Երեւանի քաղաքապետարանում Երեւանում կայանատեղիների վճարների թանկացման հարցով հանրային լսումների ժամանակ հայտարարեց հասարակական գործիչ Էդգար Ղազարյանը։

«Իշխանության գալուց առաջ ե՞րբ եք խոսք տվել երեւանցիներին, որ իշխանության գալուց հետո դուք անմիջապես ավտոկայանատեղիների վարձը բարձրացնելու եք առնվազն 2 անգամ, իսկ կենտրոնում՝ 13 անգամ»,-ասաց նա:

Ղազարյանը նկատեց, որ հունվարի 1-ից հազարավոր քաղաքացիներ՝ ի վիճակի չլինելով վճարել տարեկան 160 հազար դրամ, հասարակական տրանսպորտով է սկսելու երթեւեկել. «Արդյոք քաղաքապետարանը այս որոշմանը զուգահեռ արդեն ունի նոր տրանսպորտային սխեմա, նոր շարժակազմեր, որոնք գործի են դրվելու ուղեւորափոխադրումների կտրուկ ավելացող ծավալը:

Հաջորդը, կենտրոնը բեռնաթափելու համար պետք է ընտրվեն այլ փոխադրամիջոցներ՝ հեծանիվներ, ինքնագլորներ: Արդյոք քաղաքապետարանն ունի հեծանիվների երթուղիներ, որ մարդիկ այդ ձեւով երթեւեկեն»:

Էդգար Ղազարյանի խոսքով, արդեն հիմա տրանսպորտով մարդիկ երթեւեկում են խցկված, իսկ եթե սահամանափակվի մեքենաների մուտքը քաղաքի կենտրոն, էլ ավելի են շատանալու տրանսպորտով երթեւեկողները. «Հաշվարկներ ունե՞ք, թե ինչ է սպասվում քաղաքին այս որոշումն ընդունելուց հետո»:

Ղազարյանը նշեց, որ Երեւանին հարակից քաղաքներից մարդիկ գալիս են Երեւան աշխատանքի, բնականաբար, գալիս են իրենց մեքենաներով, հիմա նրանք որտե՞ղ պետք է կայանեն իրենց մեքենաները: Նա նաեւ առաջարկեց, որ երեկոյան ժամը 18-ից մինչեւ առավոտյան ժամը 9-ը ընդհանրապես կայանատեղիի համար գումար չգանձել: