«Նիկոլ, դավաճան» ասելու համար ձերբակալված, ապա ազատ արձակված քաղաքացուն ոստիկանությունը հիմա էլ դատի է տվել

«Նիկոլ, դավաճան» բառակապակցության համար ձերբակալված, ապա ազատ արձակված քաղաքացի Սամվել Վարդանյանն այսօր տեղեկացել է՝ «ոստիկանությունն իրեն դատի է տվել»:

168.am-ի հետ զրույցում քաղաքացին որոշ մանրամասներ է հայտնել․

«Նամակի մասին տեղեկացել եմ երեկ: Տանը չեմ եղել, մայրս է ասել, որ նամակ ունեմ ոստիկանությունից: Այսօր վերցրի՝ մեկ ժամ առաջ. ինձ դատի է տվել ՆԳՆ ոստիկանությունը՝ դատարանից պահանջելով ինձ ենթարկել վարչական պատասխանատվության ոստիկանության ծառայողի օրինական պահանջը չկատարելու համար:

Խոսքը սեպտեմբերի 26-ի առավոտյան ակցիայի մասին է, երբ Արցախի դեպքերի հետ կապված՝ փակվում էին փողոցներ»:

Սամվել Վարդանյանը վստահ է՝ հիշյալ դեպքերից մեկ ու կես ամիս անց միայն իրավապահ համակարգի իր հանդեպ այս հետաքրքրությունն իշխանությունների պատասխանն է իր հանրային գործունեությանը:

«Սա պատասխան է՝ վախեցնելու, պայքարից հետ կանգնել դրդելու: Վստահ եմ՝ սա իշխանությունների պատասխանն է իմ ակտիվությանը, հանրային վայրերում իշխանության ներկայացուցիչներին ուղղված իմ քաղաքական գնահատականներին, ֆեյսբուքյան ակտիվությանը: Գաղտնիք չի, չէ՞, որ հիմա ֆեյսբուքապետություն է Հայաստանում»,- նշել է նա, ապա սեպտեմբերի 26-ի իրադարձություններին վերադառնալով՝ հավելել․ «Զավեշտն այն է, որ ոստիկաններն ինձ տարել են ոչ թե փողոց փակելու ընթացքում, այլ կանգառի հարակից հատվածից»:

Սամվել Վարդանյանը նշել է, որ հետագա քայլերն իր համար կհստակեցնի փաստաբանի հետ խորհրդակցելուց հետո: