Հայաստանի ԱԳՆ ղեկավարը մեկնաբանել է Սյունիքի մարզում ՌԴ հյուպատոսություն բացելու հարցը
ՔԱՂԱՔԱԿԱՆՈՒԹՅՈՒՆ
Ռուսական կողմը դիմել է ՀՀ իշխանություններին Կապանում հյուպատոսություն բացելու համար և դրական պատասխան է ստացել։ Այս մասին հոկտեմբերի 25-ին Ազգային ժողովի նիստում կառավարության ժամին հայտարարել է հանրապետության արտաքին գործերի նախարար Արարատ Միրզոյանը՝ պատասխանելով պատգամավորների հարցերին։
Դիմումը, ըստ նրա, կատարվել է համապատասխան կարգով։
«Եվ Հայաստանը, համապատասխան կարգով բոլոր նրբությունները դիտարկելով, դրական եզրակացություն է տվել»,- ասել է Միրզոյանը։
Միաժամանակ նախարարը չի նշել հյուպատոսության աշխատանքի մեկնարկի կոնկրետ ժամկետները, քանի որ դա ռուսական կողմի իրավասությունն է։
«Այդուհանդերձ, Հայաստանում և Ռուսաստանի Դաշնությունում պատասխանատու կառույցները համագործակցում են այս հարցում»,- ասել է ԱԳՆ ղեկավարը։
Ըստ նախարարի, այսօր շատ երկրներ շահագրգռված են Հայաստանի Սյունիքի մարզում դիվանագիտական ներկայացուցչություններ բացելու հարցում։
«Իրանն արդեն բացել է իր ներկայացուցչությունը։ Նման ցանկություն է հայտնել նաև Ֆրանսիան։ Կան այլ երկրներ, որոնց հետ նմանատիպ երկխոսություն է ընթանում։ Բայց քանի որ վերջնական պայմանավորվածություն դեռ չկա, անունները չեմ տա»,- ասել է Միրզոյանը։
