Ծնողներն Արցախում են, երեխաները տեղափոխվել են Հայաստան. տեղահանված արցախցիների խնդիրները

«Արցախից եկող մեր հայրենակիցները շատ ծանր հոգեբանական վիճակում են, թերսնված, գերհոգնածություն ունեն, որոշներն ընտանիքի անդամներին, հարազատներին են կորցնել, բարեկամներից տեղեկություններ չունեն»,– NEWS.am–ի հետ զրույցում ասաց Գորիսի փոխքաղաքապետ Իրինա Յոլյանը։

Նրա խոսքով, այս պահին էլ անընդհատ մարդկանց հոսք կա, որոնք Գորիսում բացված կենտրոնում գրանցվում են, և կարիքների գնահատում է տեղի ունենում։ Նրանք, ովքեր երկարաժամկետ բուժման կարիք ունեն, տեղափոխվում են բժշկական հաստատություններ։ Իսկ այդպիսի արցախցիների թիվը, ըստ Գորիսի փոխքաղաքապետի, բավական մեծ է։

«Մեծ թվով առողջական խնդիրներ ունեցող քաղաքացիներ կան՝ սահմանափակ կարողություններ ունեցող, անվասայլակին գամված մեծահասակներ, ջերմություն ունեցող երեխաներ։ Շատերը թերսնման հետեւանքով առողջական խնդիրներ ունեն»։

Տեղահանված արցախցիներից ոմանց ընտանիքները կիսված են, ծնողները մնացել են Արցախում, երեխաները եկել են Հայաստան։ «Ունենք ընտանիք, որ ծնողներն այնտեղ են, երեխաները՝ այստեղ, մորաքրոջ խնամքին։ Մեզ դիմել են նաև իրենց պապիկին փնտրող արցախցիներ։ Պապիկը մնացել է Արցախում, բայց ոչ մի լուր չունեն նրանից»,– ասաց Յոլյանը։

Մեծ թվով արցախցիների տեղահանման պատճառով Գորիսում նրանց կացարանով ապահովելու խնդիր  կա։ «Գորիսը չի կարող բոլորին հյուրընկալել։ Ովքեր բարեկամներ ունեն, գնում են նրանց մոտ, իսկ մյուսներին փորձում ենք տեղավորել մյուս մարզերում»,– ասաց Գորիսի փոխքաղաքապետը։