Փաշինյանը պատրաստվում է ապօրինաբար զավթել քաղաքապետի պաշտոնը

 Կենտրոնական ըմտրական հանձնաժողովն ամփոփել է Երևանի ավագանու ընտրությունների արդյունքները։ Վերահաշվարկից հետո էական փոփոխություններ տեղի չեն ունեցել։ «Քաղաքացիական պայմանագիրը» կստանա 24, իսկ նրա գործընկեր «Հանրապետություն» կուսակցությունը՝ 8 մանդատ։ Մյուս 3 ընդդիմադիր ուժերը՝ «Ազգային առաջընթաց» կուսակցությունը Հայկ Մարությանի գլխավորությամբ, «Մայր Հայաստան» դաշինքը՝ Անդրանիկ Թևանյանի գլխավորությամբ և «Հանրային ձայն» կուսակցությունը՝ Վարդան Ղուկասյանի առաջնորդությամբ, միասին 33 մանդատ են հավաքել։

Արցախում տեղի ունեցող իրադարձությունների և ներքաղաքական սրման ֆոնին փաշինյանական իշխանությունն ամենևին էլ չի դադարեցրել Երևանի քաղաքապետի պաշտոնն ամեն գնով զավթելու իր մտադրությունները, ավելին, օգտվելով Երևանում բողոքի գործողություններից, կարողացել է մի քանի թեկնածուների ձերբակալել, մեկ-երկուսին էլ մտադիր են կալանավորել մինչև Երևանի ավագանու առաջին նիստը, երբ կայանալու է քաղաքապետի ընտրությունները։

Հոկտեմբերի 10-ին նախատեսվող առաջին նիստում քաղաքապետ պետք է ընտրվի 33 քվե ստացած թեկնածուն, իսկ եթե որևէ մեկին չհաջողվի կեսից ավելի ձայններ ստանալ, արդեն երկու շաբաթ անց, հաջորդ նիստում Երևանի քաղաքապետ կընտրվի ամենաշատ ձայներ ստացած թեկնածուն։ Հաշվի առնելով, որ ընդդիմադիրների վիճակը բարդ է լինելու պայմանավորվելու առումով, ապա «Հանրապետություն» և «Քաղպայմանագիր» կուսակցություններին կհաջողվի 32 քվե տալ Տիգրան Ավինյանին և նրան դարձնել քաղաքապետ։ Դրանից հետո, մեկ տարի շարունակ Ավինյանին պաշտոնանկ անել չի հաջողվի։ Փաշինյանական վարչախումբն առաջնորդվում է մեկ տարում կամ էշը կսատկի, կամ իշատերը սկզբունքով, ուստի և բնավ էլ չի խորշելու նման հակաօրինական մեթոդներով՝ Երևանի քաղաքապետի պաշտոնը ճանկելու մտադրությունից։ Արդյո՞ք ընդդիմությանը կհաջողվի մինչ այդ ինքնակազմակերպվել, համախմբվել և դաս տալ Փաշինյանին, բարդ է ասել։

Արիաննա Մամիկոնյան