Չնայած ոստիկանության կողմից բիրտ ուժի գործադրմանը՝ Երևանում շարունակվում են անհնազանդության ակցիաները

Չնայած ոստիկանության կողմից համատարած բիրտ ուժի գործադրմանը՝ քաղաքացիները շարունակում են անհնազանդության ակցիաները Երևանում, փակում են փողոցները, վանկարկում «Արցախ», «Նիկոլ, դավաճան», եւ մյուս քաղաքացիներին կոչ են անում միանալ Արցախի փրկության համար ժողովրդական ընդվզման ալիքին։

Մայրաքաղաքի տարբեր փողոցներից կարմիր բերետավորները բիրտ մեթոդներով են բերման ենթարկում ցուցարարներին, մի քանի ոստիկանով հարձակվում են մեկ մարդու վրա, դաժանաբար ծեծում, նույնիսկ նրանց, որոնց արդեն նստեցրել են մեքենան։ Շատ քաղաքացիներ բերման ենթարկվելիս վնասվածքներ են ստացել:

Անհնազանդության ակցիաներին միացել են մի շարք համալսարանների՝ ԵՊՀ-ի, Բրյուսովի, Մանկավարժականի, Ֆրանսիականի, ԵՊԲՀ-ի, Երևանի թատրոնի և կինոյի, Եվրոպականի ուսանողներ։ Նրանք դասադուլ են հայտարարել և հիմա փողոցներ են փակում Երեւանում։ Դասադուլին միացել են նաեւ որոշ դպրոցների աշակերտներ։ Շատ քաղաքացիներ էլ գործադուլ են հայտարարել: Անհնազանդության ակցիաներին ի աջակցություն՝ վարորդները մեքենաների ազդանշաներն են միացնում:

Ակցիաների ընթացքումմի քանի տասնյակ մարդ է բերման ենթարկվել, այդ թվում՝ «Մայր Հայաստան» շարժման համակարգող Անդրանիկ Թևանյանը, որն այնուհետեւ ձերբակալվել է։ Նրան ավելի ուշ ազատ են արձակել։

Հիշեցնենք, որ Արցախի ճակատագրով մտահոգ քաղաքացիներն արդեն երրորդ օրն է՝ հանրահավաքներ են անում կառավարության շենքի դիմաց՝ պահանջելով, որ Նիկոլ Փաշինյանը հրաժարական ներկայացնի, ինչպես նաև ՀՀ իշխանություններից պահանջում են Հայաստանում ընդունել տեղահանված արցախցիներին: Այսօր առավոտից մեկնարկել է ընդվզման նոր փուլը՝ 24/7 ռեժիմով անհնազանդության ինքնաբուխ ակցիաների տեսքով։