Արցախից շտապ պահանջում են ՄԱԿ առաքելություն ուղարկել Արցախ

Արցախից շտապ պահանջում են ՄԱԿ առաքելություն ուղարկել Արցախ։ Արցախի անվտանգության և զարգացման ճակատի համակարգող, նախկին պետնախարար Ռուբեն Վարդանյանը խոսել է ՄԱԿ անվտանգության խորհրդի նիստի վերաբերյալ, նշել, թե խորհուրդը պետք է դուրս գա միայն գործողությունների կոչերից, այլևս ոչ մի դատարկ հռետորաբանություն, մեզ կոնկրետ քայլեր են պետք։

Ներկայումս 120 հազար հայեր գտնվում են ծանր իրավիճակում, հարյուրավոր սպանվածներով, վիրավորներով և անհայտ կորածներով։ «Շտապ պահանջում ենք ՄԱԿ առաքելություն ուղարկել Արցախ։ Մեր ժողովրդին անհրաժեշտ է օգտվել այնպիսի հիմնական դրույթներից, ինչպիսիք են սնունդը, դեղորայքը, բժիշկներն ու հոգեբանները։ Մենք պետք է տեսնենք միջազգային հանրության պարտավորությունը, ոչ թե անտարբերությունը»,- նշել է Ռուբե Վարդանյանը՝ փաստելով, թե ռուսական խաղաղապահ ուժերը խիստ սահմանափակ են և նույնիսկ նրանք կրակի տակ են հայտնվել մարդկանց օգնելու փորձի ժամանակ։

Ըստ նախկին պետնախարարի, եթե միջազգային հանրությունը շարունակի հանդես գալ միայն հայտարարություններով ու խնդրանքներով, ապա զանգվածային էթնիկ զտումների վտանգն անխուսափելիորեն կմեծանա։ «Մենք խնդրում ենք ձեզ ցույց տալ, որ խոսքերը կշիռ ունեն և որ ագրեսիան, ուժի կիրառումը չի կարող հանգեցնել կայուն խաղաղության, բռնապետերը պետք է պատասխանատվության ենթարկվեն մարդկությանն իրենց հասցված տառապանքների համար և ատելությունը, որն ուղղված է յուրաքանչյուր էթնիկ խմբի՝ այս դեպքում հայերի դեմ, անընդունելի է, հրամայական է, որ դուք քայլեր ձեռնարկեք հիմա»,- նշել է Ռուբեն Վարդանյանը։

Ընդգծենք, որ Ռուբեն Վարդանյանի այս կոչն այլևս խստագույն հրամայական է դարձել Արցախի համար։ Տևական ժամանակ, նույնիսկ եվրոպացի պաշտոնյաններն ու պատգամավորներն են փաստում, որ Արևմուտքը բացառապես կոչեր և հորդորներ անելով է զբաղված, մինչդեռ Ադրբեջանը րոպե առ րոպե շարունակում է ցեղասպանության ենթարկել Արցախի բնակիչներին և եթե չիրականացնեն Ռուբեն Վարդանյանի այս կոչը, ապա լրջագույն խնդիրներ կարող են հարուցվել, ուստի և, ի վերջո, պետք է Արևմուտքը և Ռուսաստանը մի կողմ դնեն տարաձայնությունները և փորձեն ամեն ջանք գործադրել փրկելու Արցախում բնակվող հայերին։

Անի Սարատիկյան