Ռիգայի Սուրբ Գրիգոր Լուսավորիչ եկեղեցին

Alpha News-ը շարունակում է ներկայացնել Սփյուռքում գործող հայկական եկեղեցիների մասին պատմող շարքը:

1997 թվականի դեկտեմբերին Ռիգա քաղաքում դրվել է Սուրբ Գրիգոր Լուսավորիչ եկեղեցու հիմքը։ Տաճարի կառուցման համար հայկական սփյուռքը գումար է հավաքել: Եկեղեցու կառուցման նախագիծը համաձայնեցվել է Մայր Աթոռ Սուրբ Էջմիածնի հետ։ Շենքը երեսպատված է տրավերտինով, որը բերվել է Իրանից, իսկ տաճարի վրա տեղադրված զանգերը ձուլվել են Վորոնեժում։

Տաճարը կառուցվել է հայկական ճարտարապետության ավանդույթներով և կարող է ընդունել մոտ հարյուր մարդ։ Նախագծի հեղինակը Հակոբ Բաբախանյանն է։ Սուրբ Գրիգոր Լուսավորիչ եկեղեցի են այցելում Հայաստանից Լատվիա ժամանող բոլոր պաշտոնական և ոչ պաշտոնական պատվիրակությունները։ Ռիգայի հայկական եկեղեցին մտնում է Նոր Նախիջևանի և Ռուսաստանի թեմի մեջ և առաջին հայկական եկեղեցին է Բալթյան և Սկանդինավյան երկրներում։

2011 թվականին Գարեգին Բ Ամենայն Հայոց Կաթողիկոսի ձեռամբ հանդիսավոր կերպով օծվել է Ռիգայի հայկական եկեղեցին։ Եկեղեցու տարածքում գործում է Ղազարոս Աղայանի անվան հայկական կիրակնօրյա դպրոցը, որտեղ խորությամբ ուսումնասիրվում են հայոց լեզուն, հայոց պատմությունը և քրիստոնեությունը։ Եկեղեցում գործում է նաև երիտասարդական կազմակերպություն, որտեղ նրանք դասավանդում են ազգային պարեր և ունեն դրամատիկական խմբակներ։