Փաշինյանի օրոք Հայաստանում թմրանյութերի տարածումն ահռելի չափերի է հասել

Թմրաբիզնեսը վերջին շրջանում Հայաստանում ծաղկում է աննախադեպ չափերով։ Առանձնապես գաղտնիք չէ, որ իշխանության կարկառուն բազմաթիվ ներկայացուցիչներ դրանով են զբաղվում, ոչ միայն ակտիվ օգտագործում են, այլ նաև հովանավորում թմրանյութերի բիզնեսը կամ աջակցում դրանց անխափան տարածմանը։ 2018 թվականի իշխանափոխությունից հետո Հայաստանը դարձել է թմրատրաֆիկի ակտիվ զոնա, միայն այս վերջին մի քանի տարում, թմրանյութերի հետ կապված բազմաթիվ սկանդալներ են եղել, չհաշված Հայաստանի տարածքով 1 տոննա կոկայինի տարանցումը, կանեփի արտադրությունը գործարկելու լոբբինգը, այլ նման երևույթներ։

Այսօր էլ լուրջ կասկածներ կան, որ գործող վարչախմբում բազմաթիվ պաշտոնյաներ միշտ չէ, որ ադեկվատ վիճակում են, նույնիսկ խորհրդարանում որոշների ելույթներից կարելի է տպավորություն ստանալ, որ նրանք գտնվում են ազդեցության տակ։ Օրեր առաջ էլ «Քաղպայմանագրի» գրասենյակներից մեկի դիմաց ներարկիչներ և թմրանյութերի օգտագործման այլ հետքեր էին գտել։ Մեր տեղեկություններով՝ շուտով քաղաքական մի շարք ուժեր, նաև հասարակական սեկտորի ներկայացուցիչներ օրենսդրական նախաձեռնությամբ են հանդես գալու, որպեսզի տարբեր ընտրություններում թեկնածուները, կամ էլ ընտրովի ու նշանակովի պաշտոնների հավակնողները պարտադիր տեղեկանք բերեն նարկոդիսպանսերից, որ իրենք թմրանյութ օգտագործողներ չեն։

Հայաստանում թմրամոլության դեմ պայքարը պետք է սկսել վերևներից։ Շատերի ելույթները դիտելիս առցանց, կամ առանց մոնտաժի միշտ էլ կասկած կա, որ որոշ պաշտոնյաներ, այսօր էլ Երևանի ավագանու ընտրությունների որոշ թեկնածուներ գտնվում են ազդեցության տակ, լավագույն դեպքում ալկոհոլի, վատագույն դեպքում՝ թմրանյութերի։ Յուրաքանչյուր թմրաբան, նույնիսկ արտաքին տեսքից դատելով, կարող է հստակ ասել՝ օգտագործել է արդյոք տվյալ անձը թմրանյութ, թե՝ ոչ, իսկ հաշվի առնելով, թե թմրանյութն ինչպիսի վնասակար և կործանարար ազդեցություն կարող է ունենալ մարդու վրա և պետության, հարկավոր է նշել, որ այս նախաձեռնությունը չափազանց կարևոր և տեղին կարող է լինել։ Թմրամոլությունը Հայաստանում ազգային անվտանգության սպառնալիք է դարձել։

Կարեն Սարատիկյան